«Eńbek» baǵdarlamasy boıynsha úı alý úshin qujat jınaý bastaldy
NUR-SULTAN. QazAqparat - Elorda ákimdiginiń turǵyn úı qory 2017-2021 jyldarǵa arnalǵan «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda Soltústik Qazaqstan oblysynda jalǵa beriletin baspana alýǵa qujattar qabyldaýdy bastaıdy, dep habarlaıdy QazAqparat qala ákiminiń resmı saıtyna silteme jasap.
Baǵdarlama jalǵa beriletin turǵyn úı retinde Soltústik Qazaqstan oblysy Ǵabıt Músirepov atyndaǵy aýdanda (Kovylnoe s., Novoıshımskoe s., Shóptikól s., Peskı s., Razgýlnoe s.) úılerdi usynady. Baspanalardyń jalpy aýdany 70-90 sharshy metrdi quraıdy. 5 jyl ótkennen keıin páterdi jekeshelendirýge bolady, al aı saıynǵy jaldaý aqysy - 7000-9000 teńge.
Bul rette baǵdarlamaǵa qatysýshylardyń árbir otbasy múshesine 88375 teńge mólsherinde birjolǵy áleýmettik kómek tólenedi. Baǵdarlamaǵa qatysý úshin Nur-Sultandaǵy turǵyn úıge kezekte turý qajet, otbasynda 3 jáne odan da kóp bala bolýy tıis. Úmitkerlerdiń mynadaı mamandyqtardyń biri bolýy tıis: mehanızator, elektrık, tokar, qurylysshy, mal dárigeri, malshy, KamAZ júrgizýshisi, energetık. Al eger joǵaryda atalǵan mamandyq bolmasa, tegin oqý múmkindigi usynylady. Qujattardy qabyldaý Nur-Sultan qalasy ákimdiginiń «Turǵyn úı qory» KMM-de iske asyrylady, kelesi mekenjaı boıynsha: Nur-Sultan qalasy, R. Qoshqarbaev dańǵyly 39 (Qoshqarbaev-Jumabaev aýdany, «Barys» TK aıaldamasy) Jumys ýaqyty saǵat 8.30-dan 17.00-ge deıin, úzilis saǵat 13.00-den 14.30-ǵa deıin. Baılanys telefony: 8-775-408-63-83, 8-702-727-54-64.
