«Eńbek» baǵdarlamasy: BQO-da jumyspen qamtý sharalaryna 21,9 myń adamdy tartý kózdelýde
BQO jumyspen qamtýdy úılestirý jáne áleýmettik baǵdarlamalar basqarmasynyń basshysy Altaı Qulqaevtyń óńirlik kommýnıkatsııalar qyzmeti alańynda málim etkenindeı, sonyń ishinde 17,9 myń adamdy jumysqa ornalastyrý josparlanýda.
Aıtalyq, tehnıkalyq jáne kásibı bilimi bar kadrlardy daıarlaý sharalary aıasynda 1100 adam qysqa merzimdi kásibı oqýmen qamtylmaqshy.
Jappaı kásipkerlikti damytý maqsatynda 1,7 mlrd teńgeniń 302 nesıesin (aýyldyq jerdegi shaǵyn nesıeniń eń joǵary mólsheri – 2,5 myń AEK, 6,9 mln teńge, qalada 6,5 AEK, 18,1 mln teńge), sondaı-aq jańa bıznes ıdeıalardy júzege asyrý úshin 1394 qaıtarymsyz memlekettik grant (eń joǵary mólsheri – 200 AEK, 555,6 myń teńge) berý kózdelýde.
«Bıznes bastaý» jobasy boıynsha 1250 adam kásipkerlik negizderine oqytylmaqshy.
Altaı Esmaǵululynyń sózine qaraǵanda, eńbekaqysy memleket esebinen sýbsıdııalanatyn ýaqytsha jumys oryndaryna 5,3 myń, sonyń ishinde áleýmettik jumys oryndaryna 795 adam, jastar tájirıbesine 1750 jas maman, aqyly qoǵamdyq jumysqa 2785 adam jiberilmek. Oǵan qosa 12550 adam bos jumys oryndaryna ornalastyrylmaqshy.
Memleket basshysynyń halyqtyń ál-aýqatyn jaqsartý jónindegi tapsyrmalaryna sáıkes Úkimet qabyldaǵan «Jumyspen qamtýdyń 2020-2021 jyldarǵa arnalǵan Jol kartasy» baǵdarlamasy bıyl da jalǵasyn tabady.
«Baǵdarlama aıasynda 2021 jyly 18 jobany júzege asyrý úshin 10,8 mlrd teńge bólindi. Sonyń ishinde 15-i qurylys, úsheýi qaıta qurý boıynsha. Jol kartasyn júzege asyrý barysynda 710 jumys orny ashylmaqshy. Al jobalar márege jetkennen keıin 490 turaqty jumys orny paıda bolmaqshy. Sondaı-aq kásipkerlikti jańa bastaǵandar, sonyń ishinde otbasylyq jáne áleýmettik bıznesti qolǵa alǵandar úshin 2,2 mlrd teńge nesıe bólinedi. Jańa jumys ornyn ashý shaǵyn nesıeleýdiń mindetti sharty bolyp tabylady. Shaǵyn nesıeler «Bastaý bıznes» jobasynyń túlekterine 7 jylǵa deıingi merzimge beriledi. Jyldyq syıaqy mólsherlemesi 6 paıyzdan aspaıtyn shaǵyn nesıeniń eń joǵary kólemi aýyldyq jerde – 2,5 myń AEK (7,3 mln teńge), qalada – 6,5 myń AEK (19,0 mln teńge)», dedi A.Qulqaev.
