«Eńbek» baǵdarlamasy: Aqtóbelik kásipkerlerge 6 paıyzben nesıe berildi

«Aýyl sharýashylyǵyn qarjylaı qoldaý qory» AQ-y oblystyq fılıaly nesıe bóliminiń basshysy Nurlan Qosmaǵambetovtyń aıtýynsha, kásipkerlikti damytýǵa «Eńbek» baǵdarlamasymen 2019 jylǵa 3,8 mıllıard teńge bólindi.

«2018 jyly 655 kásipkerge nesıe berildi. Olarǵa 2,4 mıllıard teńgege kómek kórsetildi. Osy jyldyń bes aılyq qorytyndysy boıynsha qarjynyń 35 paıyzy ıgerildi», - dedi Nurlan Qosmaǵambetov.

Qor tilshilerge óńirde atqarylyp jatqan jumystardy kórsetti. Alǵashqy joba - tigin tsehy. Munda sanaýly adam ǵana jumys isteıdi. Degenmen kez kelgen ýaqytta tapsyrysty oryndap, qyz jasaýyn túgeldep beredi. Úıde jumyssyz otyrǵan Gúlaıda Ýbanııazova Kásipkerlik palatasy arqyly «Bastaý» baǵdarlamasyn bitirdi. Keıin enesi Jumahan Nııazymbetovanyń isin jalǵastyrý úshin «Aýyl sharýashylyǵyn qarjylaı qoldaý qory» AQ-y arqyly 6 mıllıon teńge nesıe aldy. Qarjy bes jylǵa 6 paıyzdyq ústemeaqymen berildi. Bul aqshaǵa Qytaıdan kórpe tigetin qural-jabdyq ákeldi.

«Tigin mashınasymen qatar maqta óńdeıtin apparatymyz bar. Bul ata jolymen qyz jasaýyn daıyndaýǵa múmkindik beredi. Eki jumysshymyz bar. Tapsyrys Atyraýdan, tipti Reseıden túsip jatyr. Óimiz Aqtóbe qalasyndaǵy saýda ornyna jetkizip, satamyz», - dedi kásipker Gúlaıda Ýbanııazova.

Tigin tsehy kúnine 50 kórpe tige alady. Qajetti maqta men matany Shymkent qalasynan tasıdy. Daıyn kórpe baǵasy tórt myń teńgeden bastalady.

«2018 jyly «Bastaý» baǵdarlamasy arqyly bir aı oqyp, bıznes jospar jasady. Kásipkerlik palatasy kómektesip, nesıe alýǵa qujat jınady. Aldaǵy ýaqytta taǵy da nesıe alýǵa múmkindik bar. Aýdan boıynsha ótken jyly 137 adam oqytyldy. Onyń 49-y nesıe, grant aldy. Kóbi aýyl sharýashylyǵy salasyn tańdady», - dedi Kásipkerlik palatasynyń aýdandyq fılıal dırektory Aıgúl Baýbekova.

Ekinshi bıznes joba - pantosanatorıı. Emdeý orny Mártók aýdanynyń Kazanka aýylynda ornalasqan. Aqtóbede ǵana emes, Batys Qazaqstan úshin tańsyq isti qolǵa alǵan kásipker bir jyldy artta qaldyrdy. Qazir 150 bas maral Mártókten uzap ketpeıdi. Alǵashqyda «Bıznestiń jol kartasy - 2020» baǵdarlamasymen 200 mıllıon teńge nesıe alyp isti bastap, keıin «Aýyl sharýashylyǵyn qarjylaı qoldaý qory» AQ arqyly 12 mıllıon teńge rásimdedi. Bul qarjyǵa kásipker shynjyr tabandy tıegish satyp aldy. Qysta qar toqtatyp, jol ashýǵa arnalǵan tehnıkaǵa qarjy 6 paıyzdyq ústemeaqymen berildi.

«Pantoemdeý tabıǵattyń balshyǵy, sýy emes. Maraldy baǵý, baptaý qajet. Qanynan bıologııalyq qospa jasalady. Sol qospa kúsh-qýatty, ımmýnıtetti arttyrady. HVІІІ ǵasyrdan beri Qytaı, Koreıa, Japonııa emniń bul túrip qoldanyp keledi. Aqtóbege ákelip, jerge úıretý qıyn boldy. Qoryqqanmen táýekelge bel býyp, damytyp kelemiz. Qazir tóldep jatyr. Em hımııalyq terapııadan keıin óte paıdaly. Aǵzadaǵy aýyr metaldardy shyǵaryp, tazartady», - dedi kásipker Baný Tilegenova.

Úshinshi joba - jylyjaı qurylysy. «Amır AGRO» sharýa qojalyǵynda on kásipker bar. Árbir sharýa qojalyǵy ótken jyly on úsh mıllıon teńge nesıe aldy. Barlyǵy 130 mıllıon teńge Aýyl sharýashylyǵyn qarjylaı qoldaý qorynan berildi.

«Jylyjaı aýmaǵy 1,8 ga qurap tur. Kásipkerler birigip, taǵy 30 mıllıon teńge salyp, jumys bastalyp ketti. Ótken jyly kúzde egip, qysta alǵashqy ónim alyndy. Ónimderdi Reseıdiń Orynbor, Orsk qalasynan alyp ketedi. Oral qalasynan da kelip jatyr. Jergilikti bazar kóbin alyp ketedi», - dedi kásipker Nurtas Doshtııarov.

Aqtóbelik kásipkerler úshin ońtústikten keletin kókónistiń baǵasy mańyzdy. Sebebi baǵa da únemi ózge óńirden jetkiziletin qııar men qyzanaqqa baılanysty ózgerip otyrady.

«Jylyjaıda jıyrmaǵa jýyq adam jumys isteıdi. Jańaqonys aýylynda turatyndar terim jumystaryna shaqyrylady. Bul ýaqytsha jumys. Jylyna eki ret ónim jınaımyz. Jaz jáne qys», - dedi kásipker.

Jylyjaı tamshylatyp sýarý tehnologııasyn qoldanady. Ózge jylyjaıdan ereksheligi qııar jerge egiledi. Jylý qubyry júrgizilgendikten qysta da sharýashylyqty júrgizýge múmkindik bar.

«Jylyjaı qurylysyna qajetti barlyq qarjy berildi. Qurylysqa jańa tehnologııa qoldanyldy. Birinshi ónim bıyl berildi. Tek ishki naryqty qamtyp qoımaı, eksportqa jiberilip jatyr. Nesıe 14 paıyzben berilip, onyń 10 paıyzy sýbsıdııalandy», - dedi Aýyl sharýashylyǵyn qarjylaı qoldaý qory fılıalynyń bólim basshysy Nurlan Qosmaǵambetov.

Aıta keteıik, kásipkerler jylyjaı aýmaǵyn taǵy eki gektarǵa keńeıtýdi josparlap otyr. Bıylǵy ónim tolyq jınaldy qysqa daıyndyq bastaldy.