«Eńbek» baǵdarlamasy: 3 myńǵa jýyq qostanaılyq stýdentke qoldaý kórsetilýde
QOSTANAI. QazAqparat – Qostanaı oblysynda 3 myńǵa jýyq stýdent «Eńbek» baǵdarlamasy boıynsha bilim alady. Bul týraly oblys ákimdiginde ótken apparat jıynynda aıtyldy, dep habarlaıdy QazAqparat.
Oblystyq Bilim basqarmasynyń basshysy Vasılıı Tsymbalıýk óńirdegi eńbek ónimdiligi jáne jappaı kásipkerlikti damytýdyń jyldyq jospary týraly málimet berdi. Onyń sózinshe, ótken úsh jylda «Eńbek» baǵdarlamasynyń birinshi baǵytyn júzege asyrý aıasynda tehnıkalyq jáne kásiptik bilimi bar kadrlardy daıarlaýǵa bıýdjetten 2,7 mlrd teńge bólindi.
«Baǵdarlamanyń birinshi baǵyty oblystyń tehnıkalyq jáne kásiptik bilim berý uıymdarynyń jelisi arqyly júzege asyrylady. Oblysta 2800 stýdent «Eńbek» baǵdarlamasy boıynsha bilim alady. Olarǵa birrettik ystyq tamaq pen stıpendııa qarastyrylǵan, jol júrý aqysyn tóleýge memlekettik qoldaý kórsetiledi. 2019 jyly ár aýdan-qalalardyń bilim bólimderine kvota úlestirildi. Ol tizimde oqý oryndary týraly málimetter bar. Osy kvota boıynsha Qarasý, Meńdiqara, Maılın aýdandary jaqsy nátıje kórsetti. Kerisinshe, Qarabalyq, Sarykól, Uzynkól aýdandarynyń kórsetkishteri tómen. Sol sebepti atalǵan aýdandardyń ákimderi berilgen kvotany ıgerýge tıis», - dep túsindirdi basqarma basshysy.
Jıynda aıtylǵandaı, Qostanaı ındýstrıaldy-pedagogıkalyq kolledjiniń bazasynda jyljymaly mobıldi oqý ortalyǵy ashyldy. Oqý orny eki baǵyt boıynsha bilim beredi. Olar: oqý-óndiristik sheberhanasy jáne oqý ashanasy. Budan ózge 20 aımaqtyq kolledj oblys ákimdiginiń Jumyspen qamtýdy úılestirý jáne áleýmettik baǵdarlamalar basqarmasymen birigip, qysqa merzimdi kásiptik oqýdy júzege asyrýǵa qatysady.
