Eńbek adamynyń abyroı-bedelin arttyrýǵa erekshe kóńil bólý kerek — Oljas Bektenov

ASTANA. KAZINFORM — Qazir eńbek naryǵyn transformatsııalaý júrip jatyr. Bul týraly búgin Úkimet otyrysynda Premer-mınıstr Oljas Bektenov málim etti.

— Memleket basshysy 2030-shy jylǵa qaraı 3,3 mln adamdy, sonyń ishinde 2,3 mln jas azamatty jumysqa ornalastyrý boıynsha naqty baǵyt-baǵdarymyzdy aıqyndap berdi. Halyqty jumyspen qamtý máselesin keshendi túrde sheshý úshin qazirgi tańda eńbek naryǵyn transformatsııalaý júrip jatyr. Mamandyqtar mazmuny jaǵynan ózgeriske ushyrap jatyr. Ekonomıkadaǵy qurylymdyq ózgeristerdiń nátıjesinde burynnan qalyptasqan birqatar kásip joıylyp, jańalary paıda bolyp jatyr. Memleket basshysy jarııalaǵan Jumysshy mamandyqtary jyly aıasynda eńbek adamynyń abyroı-bedelin arttyrýǵa erekshe kóńil bólý kerek. Olar zamanaýı talaptarǵa saı bolýǵa tıis, — dedi Oljas Bektenov.

Sonymen qatar ol qazir elimizde aýqymdy logıstıkalyq jáne energetıkalyq jobalar iske qosylyp jatqanyn aıtty. Túrli salalarda tsıfrlyq sheshimder belsendi engizilip otyr.

— Jalpy, keshendi sharalar jańa sapaly jumys oryndaryn qurýǵa múmkindik beredi. Eńbek mınıstrligi atalǵan jumysty salalyq mınıstrliktermen jáne ákimdiktermen turaqty túrde úılestirip, qajet jedel sharalardy qabyldaýǵa tıis. Bul rette eńbek naryǵyndaǵy ózgeristerdiń tolyq esebin júrgizip otyrý kerek, — dedi Úkimet basshysy.

Budan buryn habarlanǵandaı, sýbsıdııalanatyn jumys oryndaryn iske asyrý tártibine ózgeris engizilip jatyr.