Eńbek adamy: Qala tazalyǵyna jaýapty qarııa quraq kórpe tigedi
ASTANA. KAZINFORM — Elordada taǵy bir eńbek adamy erekshe ónerimen kópshilikti tańǵaldyryp júr. Marat Jekenov 20 jylǵa jýyq kommýnaldyq mekemede júrgizýshi bolyp jumys isteıdi. Ol qysta kóshelerdi qardan tazartyp, jazda shań-tozańdy azaıtyp, Astananyń tazalyǵyn qadaǵalaıdy. Sóıte tura, qarapaıym jumysshynyń el qyzyǵatyndaı hobbıi bar.
Marat Jekenov – qysy qytymyr, jazy aptap Astanada kóshelerdiń tazalyǵyn saqtap júrgen eńbek adamdarynyń biri. Ol kommýnaldyq tehnıkany júrgizedi jáne jumys kúni 10 saǵattyq aýsymnan turady. Joldyń ár shaqyrymy onyń tabandy eńbegimen tazaryp otyrady.
Al onyń quraq quraıtyn erekshe hobbıi kópshilikti tańǵaldyrǵan. Bul ónerge alǵash bolyp jubaıy áýestegen eken. Nemerelerine arnap jasaý tigip bersem degen tilekpen bastalǵan qyzyǵýshylyq búginde tutas bir otbasylyq kásipke aınaldy.
– Kúnde jumystan kelgende tigin mashınasy zyryldap turady. Kempirime kómektesip júrip, men de bos otyrmaıyn dep iske kirisemin, sodan úırenip kettim. Jumystaǵy kóliktiń shýynan osylaı demalamyn. Alǵashynda áriptesterim tańǵalǵan. Qazir tapsyrys beretinderi de bar. Osylaısha súıikti hobbı kishigirim tabys kózine aınaldy, – deıdi M.Jekenov.
Marat Jekenovtyń zeınetke shyǵýyna bir-aq jyl qaldy. Aldaǵy armany – kishigirim otbasylyq kásibin keńeıtip, tigin tsehyn ashý.
Eske sala keteıik, Astanada Jumysshy mamandyqtar alleıasy ashyldy.