«Eńbek adamy – 2025» baıqaýy: kimder jeńimpaz atandy

ASTANA. KAZINFORM – Almaty qalasynda Qazaqstan Jazýshylar odaǵy men Qazaqstan Respýblıkasy Ulttyq ınjenerlik akademııasy birlesip uıymdastyrǵan «Eńbek adamy – 2025» respýblıkalyq shyǵarmashylyq baıqaýynyń saltanatty marapattaý rásimi ótti.

Mádenı-rýhanı sharaǵa qalamgerler, ınjener-ǵalymdar, eńbek adamdary, zııaly qaýym ókilderi men qoǵam qaıratkerleri qatysty.

Baıqaý Memleket basshysy Qasym-Jomart Toqaev jarııalaǵan «Jumysshy mamandyqtar jyly» bastamasyn qoldaý maqsatynda ótkizildi. Jobanyń maqsaty – óndiris pen ınjenerlik salanyń qoǵamdaǵy mártebesin arttyrý jáne eńbek adamynyń shynaıy beınesin kórkem ádebıet arqyly keńinen nasıhattaý.

Saltanatty rásimdi Ulttyq ınjenerlik akademııasynyń prezıdenti, Memlekettik syılyqtyń laýreaty, Qazaqstannyń eńbek sińirgen ǵylym qaıratkeri, akademık Baqytjan Jumaǵulov pen Jazýshylar odaǵy Basqarmasynyń tóraǵasy Mereke Qulkenov ashty.

Mereke Qulkenov óz sózinde «Jumysshy mamandyqtar jyly» bastamasy eńbek adamynyń qoǵamdaǵy bedelin kóterýge baǵyttalǵan mańyzdy qadam ekenin atap ótti. Onyń aıtýynsha, baıqaýǵa el óńirlerinen 50-den astam shyǵarma kelip túsken. Roman, povest, novella, derekti ocherk pen esse janrlaryndaǵy týyndylar qazaq jáne orys tilderinde qabyldanǵan. Qazylar alqasy 21 shyǵarmadan turatyn short-lıst jasaqtap, úzdikterdi anyqtaǵan.

Qorytyndy boıynsha yntalandyrý syılyqtary «Shahterler áýleti» áńgimesi úshin Kólbaı Adyrbekulyna, «Munaıly meken tynysy» derekti ocherki úshin Amandyq Abdýlovqa, «Eltiri» hıkaıaty úshin Joltaı Almashevke, «Ǵylymnan tapqan baqytyn» derekti romany úshin Gabdýlsabıt ıÝsýpovke, «Sý jáne Tolaǵaı» áńgimesi úshin Ertaı Aıǵalıevke, «Kóktetken kóktem eken tanaptardy» essesi úshin Nurlybek Samatulyna tabystaldy. Yntalandyrý syılyǵy 200 000 teńgeni qurady.

Úshinshi oryn jáne 1 000 000 teńge júlde Qanat Nurmahanovqa «Qarashúńgil – kózimniń qarasy bul» derekti povesi úshin berildi. Ekinshi oryn men 2 500 000 teńge syıaqy Ǵalym Qalıbekulynyń «Nesibe» hıkaıatyna buıyrdy. Al birinshi oryn jáne 5 000 000 teńge júlde Qýandyq Túmenbaıdyń «Betpaqty kezgen bireý» derekti áńgimesine tabystaldy.

«Eńbek adamy – 2025» respýblıkalyq baıqaýynyń bas júldesin «Áýlet» non-fıkshn romany úshin jazýshy Sharhan Qazyǵul ıelendi. Jeńimpazǵa arnaıy dıplom, uıymdastyrýshylardyń tósbelgisi jáne 10 000 000 teńge kólemindegi qarjylaı syıaqy tapsyryldy.

Eske sala keteıik, Oljas Bektenov eńbek adamynyń abyroı-bedelin arttyrýǵa erekshe kóńil bólý kerek ekenin aıtqan bolatyn.