Eńbegimen elengen qyzylordalyq ustazdar aqshalaı marapattaldy
QYZYLORDA. QazAqparat- Qyzylordada A.Toqmaǵanbetov atyndaǵy qalalyq mádenıet úıinde Ustazdar merekesine oraı saltanatty shara ótti, dep habarlady QazAqparat tilshisi.
Qala ákimi N.Nálibaev barlyq ustazdar qaýymyn jáne sala ardagerlerin merekelerimen quttyqtap, shahar boıynsha bilim salasyndaǵy jetistikterge keńinen toqtaldy.
«Qazaqylyqtyń qaınary, Alashtyń - Anasy atanǵan aımaqtyń bul bas qalasy - Qyzylorda - keshegi alash qaıratkerleri men ult zııalylarynyń basyn qosqan kıeli meken. Qazaq tarıhyndaǵy talaı bastamalar men tyń jańalyqtardyń qasıetti Ordasy. Biz osy abyroıly joldan jańylmaı, aldaǵy ýaqytta da el múddesi úshin qyzmet eter, basqa aımaqtarǵa ulttyq bolmysy jáne qazaqylyǵymen úlgi bolarlyqtaı urpaqty tárbıeleýimiz kerek. Bul jolda ustazdar qaýymynyń eńbegi men alar orny erekshe», - dedi qala basshysy.
N.Nálibaev atap ótkendeı, búgingi shákirt - erteńgi ult bolashaǵy. Bolashaqty tárbıeleý búginnen bastalady desek, shákirt júreginde qaıyrymdylyqty, sezimniń náziktigi men sulýlyǵyn oıatý, ishki jan dúnıeni basqara bilýge úıretý, sotsıýmǵa tabysty sińisip ketýine kómektesý - muǵalimniń mańyzdy mindeti.
«Konfýtsııdiń sózimen aıtqanda, muǵalim eskini aıalaı otyryp, jańaǵa jetýge tıis. Sondyqtan, Ustaz uǵymyn ulyqtap, qadiri men qasıetin qurmetteý - barshaǵa paryz. Al olardyń jaǵdaıyn jasap, jaqsylyǵyn asyrý - mindet. Endeshe, Muǵalimder kúni - dárejesi bıik, eń ulyq ta ulaǵatty mereke» - dedi qala ákimi N.Nálibaev
Saltanatty sharada, birqatar ustazdar QR Bilim jáne ǵylym mınıstriniń Qurmet gramotasymen, oblys ákiminiń, «Nur Otan» partııasynyń Alǵys hattarymen marapattalsa, bilim salasynda eńbegimen elengen 10 muǵalimge 100 myń teńge syıaqy jáne Alǵys hattar tabystaldy.
