Eń jomart amerıkandyqtardyń reıtıngisi jarııalandy
ASTANA. 14 aqpan. QazAqparat - The Chronicle of Philanthropy jýrnaly qurastyrǵan eń jomart amerıkandyqtardyń reıtıngisi jarııalandy, dep habarlady, Dengı.ua saıty.
Reıtıngi tizimin álemdegi eń dáýletti adamnyń biri, ınvestor Ýorren Baffet bastady. 2012 jyly ol qaıyrymdylyq sharalaryna 3,1 mlrd. dollar jumsaǵan. Baffettiń úsh qaıyrymdylyq qory aýyl sharýashylyǵyn damytý, taza sýmen qamtamasyz etý, kedeıshilikpen kúres, áıelderdiń quqyǵyn qorǵaý jáne bilim salalaryndaǵy baǵdarlamalarmen aınalysady.
Reıtınginiń ekinshi jolyna Facebook-tiń negizin qalaýshy Mark Tsýkerberg pen onyń zaıyby Prıstsılla Chan ornalasty. Olar bilim berý jáne densaýlyq saqtaý baǵdarlamalaryn qoldaýǵa 498,8 mln. dollar jumsady.
Úshinshi orynǵa tabıǵı gaz satýmen aınalysatyn Centaurus Energy hedj-qorynyń negizin qalaýshy Djon Arnold pen onyń zaıyby Laýra shyqty. Erli-zaıyptylar qylmystyq ádiletti, memlekettik bilim berý jáne zeınetaqy júıesin damytý baǵdarlamalaryna 423,4 mln. dollar qarjy saldy.
Tórtinshi oryn mı qyzmetin jáne júıke aýrýlarynyń sebepterin zertteýmen aınalysatyn Mı týraly ǵylym ınstıtýtynyń negizin qalaǵan Microsoft kompanııasynyń negizin qurýshylardyń biri Pol Allenge buıyrdy, ol osy qaıyrymdylyq qyzmetine 309,1 mln. dollar qarjy quıǵan.
Kóshbasshy bestikti Google negizin qalaýshylardyń biri Sergeı Brın men onyń áıeli Enn Voıchıtskı tuıyqtap tur . Olar bilim berý, qorshaǵan ortany qorǵaý, áıelderdiń quqyǵyn qorǵaý salasynda jumys isteıtin áleýmettik kásipkerlerdiń baǵdarlamalary granttaryna 222,9 mln. dollar qarjy bólgen.
Budan buryn Forbes 15 pozıtsııadan turatyn álemniń eń baı monarhtarynyń reıtıngisin qurastyrǵany habarlanǵan bolatyn, solardyń ishindegi 7-ýi Parsy shyǵanaǵy elderinen shyqqan.
