Eń joǵary jalaqy tólenetin Gollıvýd juldyzynyń esimi anyqtaldy
ASTANA. QazAqparat - Amerıkanyń Forbes jýrnalynyń málimetinshe, bıylǵy tiziminiń eń basynda joǵary jalaqy tólenetin Gollıvýd aktrısasy retinde Sandra Býlloktyń esimi tur.
Atalmysh tizimdi qurýshylardyń 4 tamyz kúni jarııa etken aqparatyna sáıkes, ótken 12 aı ishinde 50 jastaǵy bul aktrısanyń tabysy $51 mln. quraǵan. Forbes sarapshylarynyń qorytyndysy boıynsha, onyń qarjylyq tabysqa jetýine «Gravıtatsııa» (Gravity, 2013) fılmi zor yqpalyn tıgizgen. Aıta keteıik, kartınany amerıkandyq prodıýserlerdiń bir toby 2013 jylǵy eń úzdik týyndy dep tanyǵan bolatyn. Qazirgi tańda fılmniń prokattaǵy tabysy $716 mln. jetken. «Býllok bul fılmdegi róli úshin «Oskar» syılyǵyn almasa da, saltanatty sharada qomaqty qarjylaı marapattarǵa ıe boldy», - dep habarlaıdy Forbes. Sonyń nátıjesinde aktrısa ótken jylǵy jetinshi ornynan birinshi orynǵa bir-aq kóterilgen. Qaltasynyń qalyńdyǵy jaǵynan ekinshi oryndy 23 jastaǵy aktrısa Djennıfer Loýrens (onyń tabysy $34 mln.), al úshinshi oryndy 45 jastaǵy Djennıfer Enıston ($31 mln.) alady. Gvınet Peltroý men Andjelına Djolı tórtinshi jáne besinshi oryndardy ıelenip, sáıkesinshe olardyń tabysy $19 mln. jáne $18 mln. qurady.
