Eń joǵary jalaqy - Atyraý, eń tómengi jalaqy - Soltústik Qazaqstan oblysynda
ASTANA. 11 naýryz. QazAqparat - 2012 jylǵy qańtar aıyndaǵy bir qyzmetkerdiń ortasha aılyq jalaqysy 92191 teńgeni qurady jáne bul ótken jylǵy tıisti aımen salystyrǵanda 19,0 paıyzǵa, naqty kóriniste 12,4 paıyzǵa ósti.
Bul týraly QR Statıstıka agenttiginiń baspasóz qyzmetinen habarlandy.
Agenttik málimetterine súıensek, salalyq qurylymda jalaqynyń eń úlken mólsheri kásibı, ǵylymı jáne tehnıkalyq qyzmette - 176,1 myń teńge (ortasha respýblıkalyq deńgeıden 1,9 esege asady), qarjy jáne saqtandyrý qyzmetinde - 172,4 myń teńge (1,9 ese), ken óndirý ónerkásibi jáne karerlerdi qazýda 164,9 myń teńge (1,8 ese) saqtalýda. Al eń tómengi jalaqy aýyl, orman jáne balyq sharýashylyǵyndaǵy qyzmetkerlerde belgilendi. Ol - 42,0 myń teńge bolyp otyr. Bul el boıynsha orta kórsetkishten 54,5 paıyzǵa tómen.
Sonymen qatar, óńirlik bóliniste eń joǵary jalaqy Atyraý oblysynda belgilenip, bul 171,6 myń teńgeni qurady. Atalǵan kórsetkish ortasha respýblıkalyq kórsetkishten 1,9 esege asady. Soltústik Qazaqstan oblysynda munyń shamasy 64,0 myń teńgeni qurady jáne bul el boıynsha ortasha deńgeıden 30,6 paıyzǵa tómen.
