Eń joǵary jalaqy ₸686 myńdy jańaózendikter alyp otyr, eń tómeni —Taldyqorǵanda
Ekonomıkalyq zertteý ınstıtýtynyń mamandary jalaqy boıynsha qalalar reıtıngin jasady, dep habarlaıdy QazAqparat.
«Jalaqy — qalanyń basqa eldi mekenderge qatysty tartymdylyq elementteriniń biri. Osyǵan oraı ulttyq statbıýro deregine súıene otyryp, Qazaqstannyń 26 qalasyn qamtıtyn 2021-2022 jylǵy kórsetkishterdi salystyryp, taldaý jasaldy. Sonymen qatar, jalaqy qalalar bólinisinde eń tómengi kúnkóris deńgeıiniń kórsetkishterimen salystyryldy» delingen ınstıtýt taratqan málimette.
Salystyrmaly kesteden eń joǵary jalaqy Jańaózende — 686 744 teńge, al Taldyqorǵanda eń tómen — 212 136 teńge bolǵany baıqalady. Alshaqtyq 3,2 ese.
Bir qyzyǵy, eń tómengi kúnkóris deńgeıi boıynsha Jańaózen kóshbasshy, bul qalada ómir súrýdiń joǵary qunyn sıpattaı alady (Jańaózen — 60 697 teńge, Túrkistan — 31 211 teńge).
Eń tómengi kúnkóris deńgeıi (projıtochnyı mınımým) eń tómengi qajetti azyq-túlik emes taýarlar men qyzmetterge jumsalatyn shyǵystardyń belgilengen úlesine ulǵaıtylǵan azyq-túlik sebetiniń qunynan qalyptasady.
Mysaly, azyq-túlik sebetiniń quny halyqtyń ár túrli jynystyq jáne jas toptary úshin azyq-túlik sebetine kiretin azyq-túlikti tutynýdyń ǵylymı negizdelgen fızıologııalyq normalaryn ortasha bólshek saýda baǵasyna kóbeıtý arqyly esepteledi.
Osylaısha kúnkóris deńgeıiniń shamasyn quraıtyn azyq-túlik sebeti men azyq-túlikke jatpaıtyn taýarlarǵa jumsalatyn shyǵyn eldi mekende «ómirdiń qymbattyǵyn» kórsetýi múmkin.
«Ómirdiń qymbattyǵyn» esepke alý úshin ortasha jalaqy eń tómengi kúnkóris deńgeıine qansha ret sáıkes keletinin túsiný úshin qalalar boıynsha kúnkóris deńgeıi men jalaqyny salystyrdyq. Eń kóp jalaqy Atyraý, Sátbaev, Jańaózen, Aqtaý, Jezqazǵan jáne Balqash qalalarynda, sondaı-aq basqa da birqatar monoqalalarda «ómirdiń qymbattyǵyn» jabady. Aıta ketý kerek, bul qalalarda ózin-ózi jumyspen qamtyǵan halyqtyń úlesi az, al halyqtyń kóp bóligi resmı túrde ónerkásiptik kásiporyndarda jumys isteıdi. Eń az jalaqy Qyzylorda qalasyn qospaǵanda, Qazaqstannyń birqatar ońtústik qalalarynda «ómirdiń qymbattyǵyn» jabady. Bir qyzyǵy, Astana men Almaty tizim kóshbasshylary emes. Sondaı-aq, aýtsaıder — Shymkent megapolısi, bul jasyryn «kóleńkeli ekonomıka» men esepke alynbaǵan kiristi janama túrde kórsetýi múmkin» deıdi ınstıtýt mamany Azamat Sámenov.
