Eń jasy 8, eń egdesi 92 jasta: Astanadaǵy marafonǵa 700-den asa adam qatysty
ASTANA. KAZINFORM — Jeksenbiniń tańynda qala turǵyndary Trıatlon saıabaǵynda 5 shaqyrym qashyqtyqty baǵyndyrdy, dep habarlady elorda ákimdiginiń resmı saıty.
Buqaralyq sporttyń arasynda tanymaldylyqqa ıe júgirýden 2025 jyldyń qorytyndy júgirisi uıymdastyryldy.
Synap baǵanasy -20 gradýsty kórsetse de, 700-den astam adam qatysýǵa nıet bildirdi.
— Astanadaǵy sport — jetistikter men medaldar ǵana emes, sonymen birge turǵyndardyń densaýlyǵy, ómir sapasy jáne eldiń abyroıy. Sonyń ishinde júgirý — qoljetimdi ári mezgil tańdamaıtyn sport. Oǵan búgingi jańajyldyq sporttyq is-sharamyzǵa kelgen azamattarymyz dálel. Salaýatty ómir saltyn ustanatyn jandarǵa alǵysymyzdy aıtamyz, — dedi Astana qalasy ákimdiginiń Sporttyq-buqaralyq is-sharalardy ótkizý dırektsııasy basshysynyń orynbasary Erjigit Óserbaı.
2025 jyldyń kórsetkishi boıynsha elordada turaqty túrde sportpen aınalysatyn halyqtyń sany 42%-dy quraıdy (670 myńnan astam adam). Bıyl 877 buqaralyq-sporttyq is-shara ótkizilip, 1 mıllıonǵa jýyq turǵyn qamtylǵan. Júgiriske jınalǵan qatysýshylardyń eń jasy 8-de jáne eń egdesi 92 jasta boldy.
Búgin meniń týǵan kúnim. 92 jasqa tolyp jatyrmyn. Osyndaı aıtýly sátte Astana qalasynyń jańajyldyq júgirisine qatysýǵa bel baıladym. 5 shaqyrymdy 45 mınýtta júgirdim. Buǵan deıin Almaty jáne Turkistan marathon-ynda 10 shaqyrym qashyqtyqty 1 saǵat 40 mınýtta baǵyndyrǵan edim. Keıingi jyldary basym solqyldap aýyratyndyqtan, 88 jasymda skandınavııalyq júriske bet burdym. Barlyq jastarǵa kólikpen júrýdi azaıtyp, kúndelikti keminde 5 shaqyrym júrýge keńes beremin. Áıtpese otyra berip, densaýlyqtaryńyzdy qurtasyzdar. Sportty kórip qana qoımaı, óz is-áreketterińizben aınalańyzdy ózgertýge tyrysyńyzdar. Barlyqtaryńyzdy kele jatqan Jańa jyldaryńyzben quttyqtaımyn!» — dedi 92 jastaǵy Salıha Zıgangerova.
Іs-shara sońynda qatysýshylarǵa ystyq shaı men arnaıy jańajyldyq syılyq berilip, olar lotereıa arqyly teledıdar, tońazytqysh sekildi turmystyq tehnıkalarǵa ıe boldy.
Budan buryn Kazinform tilshisi Astananyń merekelik kartasyna sholý jasap, jańa jyldyq atmosferany syılaıtyn attraktsıondar týraly jazdy.