Eń jas analar Túrkistan oblysynda turady – ulttyq komıssııa

NUR-SULTAN. QazAqparat - Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa Qazaqstanda nekege turý jasy erlerde - 27,9, áıelderde 24,8 jas ekenin málimdedi, dep habarlady QazAqparat tilshisi.

Vedomstvonyń jazýynsha, Qazaqstandyq qoǵamdyq damý ınstıtýtynyń sarapshylary nekege turý jasynyń ulǵaıýyna qatysty trendtiń bar ekenin rastaǵan.

«Elimizdegi áıelder tuńǵysh balasyn orta eseppen 25,2 jasynda dúnıege ákeledi. Túrkistan oblysyndaǵy eń jas analar - 22,5 jasta. Ekinshi oryndy Shymkent qalasy (23,9 jyl), úshinshi oryndy Jambyl oblysy (24 jyl) ıelenedi. Tuńǵyshyn eń kesh bosanatyn analar - iri qalalardyń turǵyndary. Almatyda týýdyń ortasha jasy - 28, elordada - 27 jas», - deıdi ulttyq komıssııadan.

Qazaqstandyq «Rýhanı jańǵyrý» qoǵamdyq damý ınstıtýtynyń dereginshe, qazirgi ýaqytta jastyq kezeń men áleýmettik normalar týraly dástúrli túsinikter ózgerip jatyr. Bul qoǵamdaǵy reprodýktıvti qatynastarǵa áser etedi – birinshi balasyn bosanǵan ananyń jasy birtindep ulǵaıyp keledi. Bul úrdis tek qazaqstandyq qoǵamda emes, búkil álemde baıqalady.

«Mysaly, Nıderlandy, Italııa, Ispanııa, Portýgalııa, Gretsııa sııaqty elderde áıelder tek 30 jastan keıin týady; Kanadada, Germanııada, Frantsııada, Norvegııada, Fınlıandııada, Shvetsııada - 29 jastan keıin. Bul derekterdi Eýropalyq ekonomıkalyq komıssııa taratqan», - dep tolyqtyrylǵan habarlama.