Eń úzdik jumys berýshilerge «HR-brend» syılyǵy beriledi
ALMATY. 13 naýryz. QazAqparat - Reseı men Ýkraınada dástúrli marapatqa aınalǵan «HR-brend syılyǵy» endi úzdik qazaqstandyq jumys berýshilerge de berilmek. Bul týraly atalmysh marapatty usynýshy HeadHunter kompanııalar toby ókilderi búgin Almatyda ótken baspasóz máslıhatynda málimdedi.
Joba jetekshisi Anna Glýmovanyń aıtýynsha, qazaqstandyq eń úzdik jumys berýshilerdi anyqtaýǵa arnalǵan «HR-brend syılyǵy» jeńimpazdaryn marapattaý rásimi 17 qazanda ótedi. Onda qazaqstandyq kompanııalar tuńǵysh ret - qyzmetkerlerdi tartý, yntalandyrý jáne jumysta ornyqtyrý jáne jalpy kompanııa men onyń jumys berýshi retindegi bedelin damytý boıynsha joǵary nátıjelerdi kórsetken jobalaryn tanystyratyn bolady. Olar jobanyń ózektiligi, iske asyrý ádisteriniń zamanaýılyǵy, aqyrǵy nátıjeniń qoıylǵan maqsattar men mindetterge sáıkestiligi sekildi HR-strategııalarǵa qoıylatyn talaptar boıynsha baǵalanady. Maqsat - rekrýtmenttiń zamanaýı ádisterin ilgeriletý jáne korporatıvti mádenıetti damytý. Sarapshylar olardyń arasynan «Ońtústik astana», «Qazaqstan», «Álem» atalymdary boıynsha jeńimpazdardy anyqtaıdy.
