«Eń úzdik jańajyldyq bezendirý» baıqaýynyń syıaqysy oqýlarynyń aqysyn óteý úshin stýdentterge beriledi - rektor A.Bulashev
ASTANA. Jeltoqsannyń 29-y. QazAqparat /Gúlmıra Álıakparova/ - «Eń úzdik jańajyldyq bezendirý» baıqaýynyń qorytyndysy boıynsha bas júldeni ıelengen S.Seıfýllın atyndaǵy Qazaq agrotehnıkalyq ýnıversıteti júldeniń 3 mıllıon teńge kólemindegi syıaqysyn áleýmettik jaǵynan álsiz otbasylarynan shyqqan stýdentterge oqýlarynyń aqysyn ótep berýge jaratpaq,
dep habarlaıdy QazAqparat.
Ýnıversıtet rektory Aıtbaı Bulashevtyń aıtýynsha, atalmysh soma qarjylyq qıyndyqtarǵa baılanysty oqý aqysyn óteı almaı júrgen - áleýmettik jaǵynan álsiz jáne kópbalaly otbasylardan shyqqan stýdentterdiń ýnıversıtet aldyndaǵy «boryshtaryn» óteýge jumsalatyn bolady.
Osylaı, shamamen 25 stýdent qarjylyq kómek alady dep josparlanýda. Sonymen birge, jarty jyldyń qorytyndysy boıynsha oqý aqysyn tóleı almaı kúndizgi bólimnen syrttaı bólimge aýysqan stýdentterdi de, bir jyldyq oqýlarynyń aqysyn tólep berý arqyly burynǵy oqýlaryna qaıta shaqyrtyp alý jumystary júrgizilýde.
Al irikteý, qalyptasqandaı tek úzdik stýdentterdiń arasynda ǵana júrgizilmeıdi. Óıtkeni, rektordyń aıtýynsha, orta bilimdi stýdentterdiń arasynda da ýnıversıtettiń qoǵamdyq ómirine belsendi aralasyp júrgenderi kóp.
Sondaı-aq A.Bulashev, jahandyq qarjy daǵdarysyna baılanysty boljanǵandaı, oqý aqysyn tóleı almaıtyn jastardyń sany esh artpaǵanyn atap ótti. Elbasynyń tapsyrmasymen berile bastaǵan jeńildetilgen nesıelerdi alýǵa múmkindigi bar 177 stýdenttiń 101-iniń nesıeden bas tartýy - sonyń bir dáleli dep biledi.
«Bul úrdiske sondaı-aq, ústimizdegi jyly elimiz joǵary oqý oryndarynyń stýdentterine qosymsha taǵaıyndalǵan 11 myń granttyń tıgizgen septigi de mol. QazATÝ stýdentteri bul granttyń 312-sin ıelenip, respýblıka boıynsha ekinshi oryndy ıelendi. Іrikteý oqý úzdikteriniń arasynda júrgizilgenin eskersek, bul eń aldymen - bilim sapasynyń belgisi», - dep atap ótti ol.
Esterińizge sala keteıik, S.Seıfýllın atyndaǵy QazATÝ Jańa jyl merekesi qarsańynda Astana qalasynyń ákimdigi elordadaǵy mekemeler men bıznes sýbektileriniń arasynda ótkizgen «Eń úzdik jańajyldyq bezendirý» baıqaýynda bas júldeni ıelengen bolatyn. Júldeniń marapaty - «Báıterek» músinshesin oqý ornynyń rektoryna Qazaqstan Respýblıkasynyń Prezıdenti N.Nazarbaev jeltoqsannyń 25-i kúni Táýelsizdik saraıynda ótken Jańajyldyq keshte saltanatty túrde tabys etken edi.
