Eń úzdik telejúrgizýshige baıqaý jarııalandy
ASTANA. QazAqparat - «Qazaqstan» RTRK» AQ aldaǵy kele jatqan Baılanys jáne aqparat qyzmetkerleri kúnine oraı, úzdik telejúrgizýshiler arasynda baıqaý jarııalady.
«Baıqaýdyń maqsaty - elimizdiń aımaqtarynda jumys istep jatqan fılıaldardaǵy qyzmetkerlerdiń eńbekterin elep-eskerý. Úzdik qyzmetkerlerge qurmet kórsetip, eńbekteriniń laıyqty baǵasyn berý. Sol sebepti aımaq qyzmetkerleri atalmysh sharaǵa belsendi atsalysady degen úmittemiz», - delingen «Qazaqstan» RTRK» AQ baspasóz habarlamasynda..
Baıqaý eki kezeńnen turady. 1-shi kezeń 20 sáýir men 20 mamyr aralyǵynda ótedi. Bul kezeńde ár aımaqtyń shyǵarmashylyq toptary (jańalyqtar men baǵdarlamalardyń júrgizýshileri) óz aralarynda jergilikti jerlerde baıqaý uıymdastyrady. Osy talaptar negizinde aımaqtardaǵy baıqaýlardan ozyq shyqqan úzdikter respýblıkalyq baıqaýda baqtaryn synaýǵa múmkindik alady. Ekinshi kezeń 21 mamyr men 26 maýsym aralyǵynda ótedi. Onda «Qazaqstan» RTRK» AQ-nyń aımaqtardaǵy ókildikteriniń arasyndaǵy eń bilikti maman, ıaǵnı, bas júlde - Gran-prı ıegeri anyqtalady. Sonymen qatar, osy syndy baıqaýdyń I, II, III oryn ıegerleri de belgili bolady.
Jeńimpaz, júldegerler «Qazaqstan» RTRK» AQ basshylyǵynyń arnaıy daıyndaǵan dıplomdarymen jáne baǵaly syılyqtarymen marapattalady.
