Eń úzdik qaraǵandylyq ustazdarǵa arnaıy marapattar tabys etildi
QARAǴANDY. QazAqparat - 5 qazan kúni Halyqaralyq ınvestorlar aptalyǵy (World Investor Week 2018) aıasynda halyqtyń ınvestıtsııalyq saýattylyǵyn arttyrý maqsatymen ótkizilip jatqan óńirlik kezdesýlerde, «Astana» halyqaralyq qarjy ortalyǵy (AHQO) mamandary birqatar ustazdarǵa arnaıy syılyqtardy tabys etti. Olardyń qatarynda AHQO qoldaýymen Máskeý qalasynda ótken birinshi Halyqaralyq ekonomıkalyq olımpıadasyna belsene qatysqan qaraǵandylyq mektep muǵalimderi de boldy, dep habarlaıdy QazAqparat.
Ustazdar kúnine oraı, arnaıy marapatty Qaraǵandy qalasynyń «Nazarbaev» zııatkerlik mektebi - birinshi halyqaralyq ekonomıkalyq olımpıadada úzdik óner kórsetken bilim ordasy retinde ıelense, «Úzdik ustaz» marapatyn Vıktor Nı jeńip aldy. Sonymen birge, olımpıadada altyn medaldi ıelengen, «Joǵary mekteptiń úzdik oqýshysy» atanǵan Aıǵanym Daýpbaevaǵa arnaıy marapat tabystaldy.
Ustazdardy marapattaý rásimi AHQO ákimshilik basqarmasy múshesi, basqarýshy dırektor Ernur Rysmaǵambetovtyń Nazarbaev zııatkerlik mektebindegi oqýshylarmen kezdesýi barysynda ótti. «Memleket basshysy óziniń bıylǵy joldaýynda «Nazarbaev» zııatkerlik mektebiniń standarttary men bilim berý ádistemesi basqa mektepterge de engizilsin degen tapsyrma berdi. Budan sizderdiń bilim ordalaryńyzdyń bilim berý sapasy men tıimdiligin baıqaýǵa bolady. Sondyqtan, birinshi ekonomıkalyq olımpıada halyqaralyq deńgeıde dáleldengen, joǵary standarttar men bilim sapasynyń úlgisi bola aldy»,-dedi maman.
Sonymen birge, AHQO ókili oqýshylardy qarjy jáne ekonomkıa salasyndaǵy kásibı halyqaralyq sertıfıkattardy tapsyrýǵa daıarlaıtyn arnaıy baǵdarlamanyń qolǵa alynatynyn atap ótti. «Biz bul jobany bıyldan bastap engizýdi josparlap otyrmyz. Ol aldymen Almaty q. respýblıkalyq fızıka-matematıka mektebinde engizilmek. Onyń basty maqsaty - oqýshylardy qarjy, ekonomıka salasy boıynsha halyqaralyq sertıfıkattardy tapsyrýǵa ázirleý bolyp otyr»,-dedi Ernur Rysmaǵambetov.
Aıta keterligi, qazannyń 1-7-si aralyǵynda dúnıejúziniń 80-ge jýyq elinde Halyqaralyq ınvestorlar aptalyǵy (World Investor Week 2018) ótti. Atalmysh sharanyń aıasynda, AHQO ókilderi elimizdiń birqatar qalalaryna baryp, jergilikti jastarmen ári bıznes qaýymdastyqpen kezdesken edi. Astana, Almaty, Atyraý, Shymkent, Qostanaı, Qaraǵandy jáne Óskemen syndy eldiń iri qalalarynda ótkizilgen aıtýly sharanyń basty maqsaty - halyqtyń qarjylyq ári ınvestıtsııalyq saýattylyǵyn arttyrý bolyp tabylady.
