Eń úlken tsıfrlyq urlyq: hakerler Bybit-ten 1,5 mlrd dollar urlady

ASTANA. KAZINFORM – Bybit krıptovalıýta bırjasy hakerler urlaǵan 1,5 mlrd dollardy qaıtarýǵa kómektesý úshin kıberqaýipsizdik salasyndaǵy «eń aqyldarǵa» júgindi. Bul tarıhtaǵy eń iri tsıfrlyq urlyq dep boljanyp otyr, dep habarlaıdy The Guardian.

Bybit-tiń habarlaýynsha, shabýyldaýshy bıtkoınnen keıin eń tanymal tsıfrlyq valıýtalardyń biri Ethereum ámııanyna baqylaýdy qolǵa alǵan jáne aqshany belgisiz mekenjaıǵa aýdarǵan.

Krıptobırja klıentterdi krıptovalıýtalarynyń qaýipsiz ekenine sendirýge asyqty. Bırjanyń bas dırektory Ben Chjoý áleýmettik jelide Bybit urlanǵan qarajatty qaıtarý múmkin bolmasa da, barlyq zardap shekkenderge ótemaqy tóleıtinin málimdedi.

- Bybit bul shyǵyn qalpyna keltirilmese de, tólem jasaýǵa qabiletti bolyp qalady. Klıentterdiń barlyq aktıvi 1:1 qamtamasyz etilgen, biz shyǵyndardy óteı alamyz, - dep jazdy ol X áleýmettik jelisinde.

Búkil álem boıynsha 60 mln-nan astam paıdalanýshysy bar Bybit ony buzý týraly jańalyqtar aqshany qaıtaryp alý týraly suraýlardyń kúrt ósýine sebep bolǵanyn atap ótti.

Chjoýdyń aıtýynsha, kompanııa aqshany sheship alý týraly 350 myńnan astam ótinim alǵan. Bul tranzaktsııalardy óńdeýdiń keshigýine ákelýi múmkin.

Bybit-tiń túsindirýinshe, shabýyl kompanııa Ethereum-dy «salqyn» ámııannan «ystyq» ámııanǵa josparly kóshirý kezinde boldy.

Buzyp urlaý týraly habardan keıin Ethereum baǵasy juma kúni shamamen 4%-ǵa tómendedi, biraq kóp uzamaı burynǵyǵa qaıta oraldy.

Kompanııa sondaı-aq urlanǵan qarajatty qaıtarýǵa kómektesý úshin «kıberqaýipsizdik pen krıptoanalızdegi eń jaqsy aqyl-oı ıelerin» shaqyrdy jáne qaıtarylǵan somanyń 10% syıaqysy týraly jarııalady. Soma tolyq qaıtarylǵan jaǵdaıda syıaqy mólsheri 140 mln dollar bolady.

Aıta keteıik, polıtsııa «hakerlik shabýyl» jasap, 350 mln teńgeni urlaǵan kúdiktini ustady.