Eń úlken shańyraq: Almatyda Naýryz kúnderi álemdik rekord ornatyldy
ALMATY. KAZINFORM — Oqıǵany saltanatty túrde tirkeý rásimi Tuńǵysh Prezıdent saıabaǵyndaǵy merekelik kontsert bastalar aldynda ótti.
Saıabaqtyń qaq ortasyna ornatylǵan bıiktigi 11 metrden asatyn, dıametri 20 metrden asatyn shańyraq Global Best of Records álemdik rekordtar kitabyna engizildi. Osy oqıǵaǵa arnaıy uzyndyǵy 100 metrden asatyn syrly syrmaq daıyndaldy.
Azııa jáne Afrıka elderi boıynsha rekordtty tirkeý bóliminiń bas ofıtseri Qýandyq Qudaıbergenov tirkeý rásimin júrgizip, sertıfıkatty Almaty qalasy Bostandyq aýdanynyń ákimi Azamat Qaldybekovke saltanatty túrde tabystady.
Kóptegen almatylyqtar men megapolıs qonaqtary kýá bolǵan is-shara barysynda ulttyq kıim kıgen áıelder alyp shańyraqtyń astyna toqylǵan syrly syrmaqty jaıyp shyqty.
Bul kórinis kórermenderdiń erekshe qyzyǵýshylyǵyn týdyrdy — kóptegen qonaqtar aýqymdy kompozıtsııa aıasynda sýretke túsip, beınejazba jasady.
Oqıǵanyń mańyzy týraly Qýandyq Qudaıbergenov aıtyp ótti.
— Global Best of Records rekordtar kitaby — Gınnestiń rekordtar kitabymen qatar álemge tanymal halyqaralyq reestrlerdiń biri. Bizdiń kitap álemdegi eń iri jınaqtardyń qataryna kiredi jáne 89 eldi biriktiredi, — dedi ol.
Kontserttik baǵdarlama aıasynda Azııa jáne Afrıka elderi boıynsha rekordtty tirkeý bóliminiń bas ofıtseri rekordtyq kólemdegi syrly syrmaqty ázirlegen sheberler tobyna da marapat tabystady.
Bul oqıǵa ulttyq óner men qazaqstandyq sheberlerdiń tól qoltańbasyn aıqyn tanytqan jarqyn beleske aınaldy.
