Eń tómengi jumyssyzdyq deńgeıi Astanada tirkelgen
ASTANA. QazAqparat - Eń tómengi jumyssyzdyq deńgeıi elordada tirkelgen, jalaqy ósip, kommýnaldyq tarıfter tómendeýde, medıtsınalyq qyzmet sapasy jaqsaryp keledi, dep habarlaıdy Astana qalasy ákiminiń baspasóz qyzmeti.
2018 jyldyń qorytyndysy boıynsha Astana qalasy turǵyndarynyń ekonomıkalyq damý men áleýmettik turaqtylyǵynyń ósýi baıqalýda, dep habarlady strategııalyq jáne bıýdjettik josparlaý basqarmasynda.
Eńbek naryǵyna keletin bolsaq, Astanada bul salada jaǵdaı turaqty. Elimiz boıynsha eń tómengi jumyssyzdyq deńgeıi - 4,5% elordada tirkelgen. Sonymen qatar, biz 4 myńnan astam medıtsına qyzmetkeriniń jalaqysy 20% kóterilgen. Ortasha aılyq nomınaldy jalaqy 5,6% ósti, jan basyna shaqqandaǵy nomınaldy aqshalaı tabys - 9,4% quraıdy.
Memleket basshysynyń tapsyrmasyna sáıkes tabıǵı monopolııalardyń qyzmetterine tarıfter tómendedi. Atap aıtqanda, elektr energııasyna tarıf - 13%, sýmen jabdyqtaý jáne aǵyn sýlarǵa - 10%, jylý berý 9%, qoqysty shyǵarý, lıft qyzmetterin jáne páter ıeleriniń kooperatıvi (PIK) qyzmetteri 5%-ǵa kemidi.
«Odan bólek, 2023 jylǵa deıin Astana qalasynyń yqshamdy damýynyń keshendi jospary bekitilip, iske asyrylýda. Jospar aıasynda ınfraqurylym turǵysynan alǵanda, 121 km jol, 2 jol aıyryǵy, 3 kópir, 1 jol ótpesi, 1 týnnel, sondaı-aq jeńil relsti kóliginiń 1-shi joly (LRT), 150 km sýmen jabdyqtaý jelileri men 81 km sý burý jelileri salynady. Sondaı-aq, aǵyn sýlar qubyry problemasy da sheshiletin bolady», - dep atap ótti vedomstvoda. Sonymen qatar, áleýmettik ınfraqurylymdardyń sany artady, jalpy 63 myń orynǵa arnalǵan 37 mektep pen 10 mektepke japsarlas ǵımarat, 25 jańa balabaqsha, 15 densaýlyq saqtaý nysany salynyp, memlekettik-jekeshelik áriptestik aıasynda medıtsınalyq mekemelerge qoljetimdilikti qamtamasyz etýge baǵyttalǵan «Úıdegi dáriger» jobasy iske asyrylatyn bolady. Astana qalasy boıynsha «7-20-25» baǵdarlamasy aıasynda ekinshi deńgeıli banktermen 22 mlrd teńgeniń nesıesi maquldandy (QR úlesi - 41%), bul 1628 otbasyn turǵyn úımen qamtamasyz etýge múmkindik beredi.
«Baspanany odan ári qoljetimdi etý jáne qala qyzmetterine eń qajetti mamandardy tartý úshin bilim berý, densaýlyq saqtaý jáne polıtsııa qyzmetkerlerine turǵyn úı satyp alýǵa jergilikti bıýdjetten 100 mln teńge kóleminde áleýmettik kómek kórsetildi. Sertıfıkat túrinde 1 mln teńgege alǵashqy 100 sýbsıdııa bólindi. Bıyl da 2 000 sýbsıdııa (sertıfıkat) berý josparlanǵan», - dep atap ótti qalalyq strategııalyq jáne bıýdjettik josparlaý basqarmasynda.
