Eń tómengi jalaqynyń ulǵaıýy qansha adamnyń tabysyna áser etedi
«Memleket basshysynyń tapsyrmasyn oryndaý úshin 2022 jylǵy 1 qańtardan bastap ETJ mólsheri aǵymdaǵy 42,5 myń teńgeden 60 myń teńgege deıin ulǵaıtylatyn bolady. Osylaısha, eń tómengi jalaqy mólsheriniń ósýi 41%-dy quraıdy. Eńbek kodeksine sáıke,s jumys berýshiler jumyskerlerge eńbekaqyny ETJ-dan tómen emes deńgeıde qamtamasyz etýge mindetti bolady. Bul shara barlyq saladaǵy ártúrli menshik nysanyndaǵy kásiporyndarda jumys isteıtin 1,6 mln adamnyń aqshalaı tabysynyń ósýine alyp keledi», - delingen mınıstrlik málimetinde.
Birinshi kezekte ETJ kóterilýi «jalaqysy tómen» qyzmetkerlerge qatysty bolady. Ekinshiden, jalaqy deńgeıin belgileý kezinde ETJ kórsetkishin paıdalanatyn jumys berýshiler, qyzmetkerlerdiń basqa da sanattarynyń jalaqysyn qaıta qaraıtyn bolady.
«Budan basqa, Úkimet bıýdjet salasy qyzmetkerleriniń jalaqy deńgeıin arttyrý jóninde dáıekti sharalar qabyldaýda. Máselen, 2020 jyldan bastap pedagogtardyń jalaqysy kezeń-kezeńimen artyp, 2023 jylǵa qaraı ol 2 esege artady. 2021 jyly medıtsınalyq jáne áleýmettik qyzmetkerlerdiń jalaqysyn kezeń-kezeńimen arttyrý bastaldy, nátıjesinde 4 jyl ishinde olardyń jalaqysy 2 esege artady. 2022 jyldan bastap mundaı joǵarylaý áser etpegen sanattardyń jalaqysy ulǵaıady. Olar – muraǵatshylar, kitaphanashylar, murajaıtanýshylar, ormanshylar, tehnıkalyq qyzmetkerler jáne basqalary, ıaǵnı shamamen 588 myń adam. Qazirgi ýaqytta daıyndyq jumystary júrip jatyr», - dep atalyp ótken vedomstvo aqparatynda.
Jalpy 1,2 mıllıonǵa jýyq azamattyq qyzmetshiniń jalaqysy joǵarylaıdy.
Sonymen qatar, aǵymdaǵy jyldyń úshinshi toqsanynyń qorytyndysynda halyqtyń ataýly tabysy ótken jyldyń uqsas kezeńimen salystyrǵanda 15,4%-ǵa, ınflıatsııany eskergende – 6%-ǵa ósti. 2021 jyldyń úshinshi toqsanynda ortasha jalaqy 243 667 teńgege jetip, ótken jyldyń úshinshi toqsanynan 19% artyq deńgeıdi kórsetti. Bul rette ınflıatsııany eskere otyryp, naqty mánde jalaqynyń ósýi 9,8%-dy qurady.
Budan buryn habarlanǵandaı, 2022 jylǵy 1 qańtardan bastap eń tómengi kúnkóris deńgeıiniń shamasyn jáne aılyq eseptik kórsetkishti 5%-ǵa ındeksatsııalaý josparlanyp otyr. Nátıjesinde, ETK mólsheri 36 018 teńgeni, al AEK – 3 063 teńgeni quraıdy.
Sonymen qatar, 2022 jylǵa arnalǵan respýblıkalyq bıýdjette memlekettiń áleýmettik mindettemelerin oryndaýǵa 4 trln teńge, onyń ishinde zeınetaqy men barlyq áleýmettik járdemaqylardyń mólsherin ındeksatsııalaýǵa 190,4 mlrd teńge kózdelip otyr.
