Eń tómengi jalaqyny belgileýdiń jańa ádisi aıqyndalýda
ASTANA. QazAqparat - Elimizde eń tómengi jalaqyny belgileýdiń jańa ádisi aıqyndalyp jatyr. Búgin Parlament Májilisiniń jalpy otyrysynda Eńbek jáne halyqty áleýmettik qorǵaý mınıstri Tamara Dúısenova osylaı málim etti.
Eske salaıyq, jalpy otyrysta «Eń tómengi jalaqyny belgileý rásimin jasaý týraly konventsııany (26-konventsııa) ratıfıkatsııalaý týraly» zań jobasy talqylanǵan bolatyn. Mınıstrdiń sózine qaraǵanda, byltyrǵy jyly elimizde eń tómengi jalaqy standarttaryna qatysty zertteýler júrgizilip, qazirgi tańda bul jumys tolyq aıaqtalǵan. Bul zertteýlerge atsalysqan ulttyq jáne halyqaralyq sarapshylar óz usynymdaryn da ázirlegen. «Konstıtýtsııamyzda eń tómengi jalaqynyń standarty bolýy tıistigi aıqyndalǵan. Sondyqtan da, bizde eńbek jalaqysyn belgileýdiń biryńǵaı mehanızmi bar dep aıtýǵa bolady. Bul ekonomıkanyń barlyq salalaryndaǵy jumysshylarǵa qatysty. Al erekshe eńbek jaǵdaıyna tartylǵan, densaýlyǵyna zııandy salada jumys isteıtin tulǵalarǵa qatysty mólsher eń tómengi jalaqy standartynan sál joǵary bolady», - deıdi mınıstr T. Dúısenova. Onyń aıtýynsha, zertteýler negizinde eń tómengi jalaqy mólsherin belgileýdiń tórt túri qarastyrylǵan. «Biz jaqyn aralyqta bul usynymdardy jumys tobyna shyǵaratyn bolamyz. Jumys toby maquldaǵannan soń ol qoǵam talqysyna shyǵarylatyn bolady», - deıdi mınıstr.
