Eń tómengi jalaqyny belgileý rásimin jasaýǵa arnalǵan konventsııa maquldandy - Májilis
ASTANA. QazAqparat - Búgin Parlament Májilisiniń jalpy otyrysynda palata depýtattary «Eń tómengi jalaqyny belgileý rásimin jasaý týraly konventsııany (26-konventsııa) ratıfıkatsııalaý týraly» zań jobasy maquldandy.
Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, Konventsııanyń negizgi maqsaty memelkettiń eń tómengi jalaqyny belgileý rásimin saqtaý quqyǵyn qamtamasyz etý bolyp tabylady. Bul rette árbir memleket jalaqyny ujymdyq shart arqyly nemese ózge de jolmen tıimdi retteýdiń belgili rásimi bolmaǵan jáne jalaqysy óte tómen ónerkásiptiń belgili bir salalarynda (atap aıtqanda úı sharýashylyǵynda) jumys isteıtin eńbekshiler jalaqysynyń eń tómengi mólsherlerin belgileýge mindetteledi. «Elimizdiń aǵymdaǵy jaǵdaıy jáne uzaq merzimdi damý mindetterimen baılanysty qolda bar múmkindikter, tıimdilik pen qajettilik osy konventsııany qabyldaýdyń negizdemeleri bolyp tabylady. Sonymen qatar, jalaqynyń eń tómengi mólsherin belgileý jáne tóleý Qazaqstannyń Konstıtýtsııasynda belgilengen asa mańyzdy áleýmettik kepildikterdiń qataryna jatady. Budan bólek, elimizde eńbekaqyny tóleý kepildikteri men eń tómengi jalaqyny belgileý rásimi Eńbek kodeksimen rettelgen jáne ekonomıkanyń barlyq salalarynyń qyzmetkerleri úshin birdeı bolyp tabylady», deıdi T. Dúısenova. Jalpy, konventsııa boıynsha eń tómengi mólsherlemeler qoldanylatyn jáne jalaqyny anaǵurlym tómen mólsherlemeler boıynsha alǵan júmysshy ózine tolyq tólenbegen somany sot tártibimen alýǵa quqyǵy qaralady.
