Eń tómengi jalaqyny belgileý rásimin jasaý týraly konventsııa Senattyń jalpy otyrysyna shyǵarylady
ASTANA. QazAqparat - Búgin Senattyń Áleýmettik-mádenı damý komıtetiniń keńeıtilgen otyrysy bolyp ótti. Onda komıtet músheleri «Eń tómengi jalaqyny belgileý rásimin jasaý týraly konventsııany (26-konventsııa) ratıfıkatsııalaý týraly» zań jobasyn talqylady.
Konventsııanyń negizgi maqsaty memlekettiń eń tómengi jalaqyny belgileý rásimin saqtaý quqyǵyn qamtamasyz etý bolyp tabylady. Bul rette árbir memleket jalaqyny ujymdyq shart arqyly nemese ózge de jolmen tıimdi retteýdiń belgili rásimi bolmaǵan jáne jalaqysy óte tómen ónerkásiptiń belgili bir salalarynda (atap aıtqanda úı sharýashylyǵynda) jumys isteıtin eńbekshiler jalaqysynyń eń tómengi mólsherlerin belgileýge mindetteledi.
«Jalpy, Konventsııa Halyqaralyq Eńbek Uıymyna múshe-memleketter tarapynan belgili bir salalar úshin jalaqynyń eń tómengi mólsherin belgileýdi engizý men sony saqtaýdyń úderisterin qamtamasyz etýge baǵyttalady», - deıdi Eńbek jáne halyqty áleýmettik qorǵaý vıtse-mınıstri Qaırat Ábsattarov.
Onyń aıtýynsha, qujattyń 4-babyna sáıkes, naqty salalardaǵy eńbek jalaqysynyń deńgeıi bekitilgen eń tómengi mólsherden kem bolmaýy kerek jáne bul kelisimsharttar men ujymdyq kelisimder arqyly tómendetilmeýi tıis. Bul rette konventsııany qabyldaǵan árbir memleket osy máselelerdiń júzege asýyna barlyq sharalardy qabyldaıtyn bolady.
Jalpy, vıtse-mınıstrdiń aıtýynsha, elimizdiń aǵymdaǵy jaǵdaıy jáne uzaq merzimdi damý mindetterimen baılanysty qolda bar múmkindikter, tıimdilik pen qajettilik osy konventsııany qabyldaýdyń negizdemeleri bolyp tabylady.
Tutastaı alǵanda, konventsııa boıynsha eń tómengi mólsherlemeler qoldanylatyn jáne jalaqyny anaǵurlym tómen mólsherlemeler boıynsha alǵan júmysshy ózine tolyq tólenbegen somany sot tártibimen alýǵa quqyly bolady.
