Eń tómengi jalaqyny anyqtaýdyń jańa ádistemesi tıisti kelisýden ótip jatyr - mınıstrlik

ASTANA. QazAqparat – Eń tómengi jalaqyny anyqtaýdyń jańa ádistemesi memlekettik organdarda kelisýden ótip jatyr. Bul týraly Eńbek jáne halyqty áleýmettik qorǵaý mınıstriniń mindetin atqarýshy Tamara Dúısenova aıtty, dep habarlaıdy QazAqparat tilshisi.

«Mınıstrlik eń tómengi jalaqyny anyqtaýdyń jańa ádistemesin ázirleý jumystaryn jalǵastyryp jatyr. Eń tómengi jalaqy mólsheri medıandyq jalaqy men eńbek ónimdiligine qaraı aıqyndalady. Búginde Ádisteme múddeli memlekettik organdarmen jáne áleýmettik áriptestermen kelisilip jatyr. Bıylǵy 1 shildege deıin Ádistemeni zańnamalyq turǵydan bekitý úshin Eńbek kodeksine engiziletin túzetýlerdi ázirleýdi josparlap otyrmyz», - dedi T. Dúısenova Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde.

Budan buryn habarlanǵandaı, zııandy eńbek jaǵdaıynda jumys isteıtinderdi áleýmettik qorǵaý tásilderi ázirlendi.

sonymen qatar, múgedektigi bar azamattarǵa, olarǵa kútim jasaıtyndarǵa beriletin áleýmettik járdemaqylar mólsherin taǵy 14,5 paıyzǵa kóterý máselesi pysyqtalyp jatyr.