Eń tómengi kúnkóris somasy qaı óńirde
NUR-SULTAN. QazAqparat - Qazaqstanda kúnkóris mınımýmy bir aıda 2 paıyzǵa ósti, dep habarlaıdy QazAqparat tilshisi finprom.kz saıtyna silteme jasap.
«Kúnkóris mınımýmy bir aıda 3 paıyzǵa, al bir jyl ishinde 14 paıyzǵa derlik ósti. Bul rette aılyq ınflıatsııa deńgeıi - 1, al jyldyq ınflıatsııa 6 paıyz boldy. El boıynsha eń tómengi kúnkóris mınımýmymy Batys Qazaqstan oblysynda tirkeldi. Kósh basyndaǵy elordamen alshaqtyq 22 paıyzdan joǵary» - delingen taratylǵan aqparatta.
QR Ulttyq ekonomıka mınıstrligi Statıstıka komıtetiniń málimetinde, Qazaqstan boıynsha halyqtyń jan basyna shaqqandaǵy kúnkórisiniń eń tómengi shamasy 31,6 myń teńgeni qurap, 2020 jyldyń naýryzymen salystyrǵanda 2,8 paıyzǵa jáne 2019 jyldyń sáýirimen salystyrǵanda 13,5 paıyzǵa artty.
Esterińizge sala ketsek, 1 sáýirden bastap Qazaqstanda aılyq eseptik kórsetkish mólsheri ulǵaıtylyp, 2 778 teńgeni qurady. Jyl basynda ol 2 651 teńgege artqan bolatyn. Bul óz kezeginde kúnkóris mınımýmynyń da ósýine ákeldi. Sonymen qatar AEK-ke baılanysty eń tómengi jalaqy, tómengi zeınetaqy mólsheri de artty.
Kúnkóris mınımýmynyń eń úlken somasy elordada 36,4 myń teńge bolsa, odan keıingi orynda turǵan Mańǵystaý oblysynda 36,2 myń, Almatyda 35,2 myń teńgeni quraıdy. Al eń tómengi soma Batys Qazaqstan (28,2 myń teńge), Aqtóbe (28,37 myń teńge) jáne Pavlodar oblystarynda (28,48 myń teńge) tirkelgen.
