Eń tómengi kúnkóris kólemi shyndyqqa saı kelmeıdi – depýtat

ASTANA. QazAqparat – Májilis depýtaty, Áleýmettik-mádenı damý komıtetiniń tóraǵasy Jámılá Nurmanbetova «Áleýmettik kodeks» jobasyn synǵa aldy, dep habarlaıdy QazAqparat tilshisi.

Aıta keteıik, Úkimet saǵatynda Eńbek jáne halyqty áleýmettik qorǵaý mınıstri Tamara Dúısenova Áleýmettik kodeks jobasynyń negizgi baǵyttaryn baıandaǵan edi.

«Bul kodeks túrli qaterler týyndaǵan kezde áleýmettik qoldaý kórsetýdiń kópdeńgeıli modeline negizdelgen. Biz bul tásildi qoldaımyz. Biraq alańdatatyn bir nárse – áleýmettik qorǵaý júıesiniń zańnamalyq negizi jańǵyrýyna qaramastan halyqtyń ál-aýqatynyń aıtarlyqtaı ósýi baıqalmaıdy», - dedi Jámılá Nurmanbetova Áleýmettik kodeks jobasy týraly Úkimet saǵatynda.

Depýtattyń aıtýynsha, Áleýmettik kodekste eskirgen jáne negizsiz áleýmettik parametrler qoldanylady.

«Táýelsizdik qarsańynda engizilgen aılyq eseptik kórsetkish («AEK») áli qoldanylyp keledi. Iá, bul josparlaý úshin yńǵaıly bolýy múmkin. Biraq AEK ekonomıkaǵa da, jalaqyǵa da baılanysty emes. Sondyqtan bolashaqta áleýmettik tólemderdi aýdarýda biryńǵaı kórsetkishke súıený oryndy dep sanaımyz. Ne eń tómengi kúnkóris deńgeıine, nemese – eń tómengi jalaqyǵa», - dedi ol.

Sonymen birge taǵy bir másele – áleýmettik parametrlerdi anyqtaýdyń tıisti ádisteriniń bolmaýy.

«Osylaısha, eń tómengi kúnkóris kólemi shyndyqqa saı kelmeıdi. Jyl basynan bergi 10 aıda azyq-túlik ınflıatsııasy shamamen 20%-ǵa jetti. ıAǵnı, zeınetaqy men járdemaqylardy esepteý úshin salynǵan eń tómengi kúnkóris deńgeıi azamattardy qajetti áleýmettik tólemdermen qamtýǵa múmkindik bermeıdi. Sondyqtan mınıstrlikke eń tómengi kúnkóris deńgeıin esepteý ádistemesin jetildirý jumysyn bastaýdy usynamyz», - dedi J. Nurmanbetova.