Eń tómengi kúnkóris deńgeıiniń mólsherin ulǵaıtý kerek - H. Valıev
ASTANA. 27 qyrkúıek. QazAqparat - Eń tómengi kúnkóris deńgeıiniń mólsherin ulǵaıtý kerek. Búgin QR Parlamenti Senatynyń jalpy otyrysynda Premer-Mınıstr Serik Ahmetovtiń atyna depýtattyq saýal joldaǵan senator Hýseın Valıev osy máseleni kóterdi.
Depýtattyń aıtýynsha, «Ardagerler uıymy» respýblıkalyq qoǵamdyq birlestigi fılıaldarynyń birqatar ótinishteri saýal joldaýǵa sebep bolǵan. «Qazaqstanda jan basyna shaqqandaǵy jalpy ishki ónim jyldan jylǵa ósip keledi. Alaıda, eń tómengi kúnkóris deńgeıi elimizdegi zeınetkerlerdiń qajettilikterin qanaǵattandyrmaıdy. Óıtkeni onyń bekitilgen mólsheri (17 439 teńge) naqty tutyný qorjynyn toltyrý úshin jetkiliksiz», - deıdi H. Valıev. Onyń aıtýynsha, elimizdegi eń tómengi kúnkóris deńgeıiniń 60 paıyzyn azyq-túlik ónimderi, al 40 paıyzyn azyq-túlik emes taýarlar quraıtyn tutyný qorjynynyń eń tómengi qunyna súıene otyryp anyqtalady. Azyq-túlik emes qorjyny kommýnaldyq qyzmetterdiń tólemaqysyn, kıim-keshekke, kólikke jáne basqalarǵa ketetin shyǵyndardy qamtymaıdy.
«Sonymen birge, kommýnaldyq tólemaqy quny jyl saıyn ulǵaıyp keledi. Elimizdiń soltústik óńirlerinde jylytý maýsymy respýblıka boıynsha eń uzaq ári eń qymbat bolyp tabylady. Osy oraıda, tutyný qorjynynyń azyq-túlik emes bóligine qatysty baǵalardy eskere otyryp, eń tómengi kúnkóris deńgeıiniń mólsherin ulǵaıtý múmkindigin qarastyrýdy usynamyz. Eń tómengi kúnkóris deńgeıiniń ulǵaıtylýy qosymsha memlekettik kómekti alýshylardyń sanyn azaıtyp, suranysty ulǵaıtady. Bul óz kezeginde, taýar óndirýshilerdiń qyzmetine oń áserin tıgizeri anyq», - dedi senator. Sonymen qatar, ol Keden Odaǵyna múshe memleketterde eń tómengi kúnkóris deńgeıi bizdiń elimizdegiden eki ese joǵary ekenin de eske saldy.
