Eń tómengi kúnkóris deńgeıi: Azyq-túlik tizimi 43-ten 51 ataýǵa deıin arttyrylady
NUR-SULTAN. QazAqparat – Qazaqstanda azyq-túlik tutyný mólsheriniń táýliktik qýattylyǵyn 2 175 kkal-dan 2 330 kkal-ǵa deıin kóterý máselesin qarastyrý josparlanyp otyr. Bul týraly Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
«Eń tómen áleýmettik standarttar jáne olardyń kepildikteri týraly» Qazaqstan Respýblıkasy Zańynyń 16-babyna sáıkes eń tómengi kúnkóris deńgeıi (ETKD) áleýmettik qamsyzdandyrý salasyndaǵy eń tómen áleýmettik standarttardyń biri bolyp tabylady. Halyqaralyq jáne ulttyq sarapshylardy tartý arqyly júrgizilgen zertteý nátıjesinde ETKD esepteý ádistemesin jetildirý boıynsha sharalardy eki kezeńmen júzege asyrý qarastyryldy.
Birinshiden, 2018 jylǵy 1 qańtardan bastap ETKD-niń qurylymy qaıta qaralyp, azyq-túlik emes taýarlarynyń úlesi 40 paıyzdan 45 paıyzǵa deıin ósti. Nátıjesinde ETKD mólsheri 2017 jylmen salystyrǵanda (24 459 teńgeden 28 284 teńgege deıin) ulǵaıdy jáne 3 mln astam azamattyń kirisine oń áser etti. Bul maqsatqa respýblıkalyq bıýdjetten qosymsha 386 mldr teńge bólindi», - dedi Asqar Mamın.
Úkimet basshysynyń atap ótýinshe, 2020 jyly eldegi epıdemıologııalyq jaǵdaıǵa baılanysty ETKD mólsheri 10 paıyzǵa nemese 29 698 teńgeden 32 668 teńgege deıin kóterildi. Sáıkesinshe, ETKD mólsherimen eseptelgen áleýmettik tólemderdiń mólsheri ulǵaıtyldy. Osy maqsatqa qosymsha 140 mlrd teńge jumsaldy.
«Ekinshiden, sońǵy jyldary halyqtyń azyq-túlik ónimderin tutynýynda bolǵan ózgerister, eldiń azyq-túlik naryǵynyń erekshelikteri jáne Qazaq tamaqtaný akademııasynyń usynystary eskerile otyryp, azyq-túlik taýarlarynyń tizimin 43-ten 51 ataýǵa deıin arttyrý, azyq-túlik tutyný mólsheriniń táýliktik qýattylyǵyn 2 175 kkal-dan 2 330 kkal-ǵa deıin kóterý máselesin qarastyrý josparlanyp otyr. ETKD-niń mólsherin memlekettiń bazalyq áleýmettik tólemderin esepteýdiń negizi retinde, tutyný sebetiniń naqty qunyn kórsete otyryp, turaqty negizde qaıta qaraý Qazaqstan Respýblıkasy Prezıdentiniń 2018 jylǵy 15 aqpandaǵy № 636 Jarlyǵymen bekitilgen Qazaqstan Respýblıkasynyń 2025 jylǵa deıingi Strategııalyq damý josparyna sáıkes júzege asyrylady», - dedi QR Premer-Mınıstri.
