Eń tómengi aılyqty 85 myń teńgege jetkizý jalpy eńbekaqynyń ósýine túrtki bolady - Satybaldy Dáýletalın
«Ekonomıka mıllıondaǵan eńbek adamdarynyń qatysynsyz damymaıdy. Sondyqtan, eńbek qatynastary men áleýmettik problemalar eldiń ekonomıkalyq kórsetkishterimen birge sheshilip otyrýy kerek.
2 mıllıon adamnyń eńbek múddesin qorǵaıtyn Qazaqstan Kásipodaqtar federatsııasy úshin Joldaýdaǵy eń tómengi aılyq mólsherin 85 myń teńgege jetkizý týraly tapsyrmasy aıryqsha boldy. Bul tapsyrma 2024 jyldyń 1 qańtarynan bastap iske asady jáne qazaqstandyqtardyń ekonomıkalyq qabiletin arttyrady. Eń tómengi aılyqtyń ósýi jalpy eńbekke tólenetin aqyny arttyrýǵa túrtki bolady. Sonymen birge, kóleńkeli eńbekaqylardy jaryqqa shyǵýǵa yntalandyrady», - deıdi uıym basshysy.
Joldaýda 2030 jylǵa deıingi eńbek qaýipsizdiginiń tujyrymdamasy qabyldanatyny aıtyldy. Satybaldy Dáýletalın osy qujattyń jobasyn ázirleýge belsendi atsalysýǵa daıyn ekenderin jetkizdi.
«Keıingi bes jylda óndiristegi jaraqattaný dınamıkasy tómendegenine qaramastan, jaǵdaı jaǵymsyz kúıde qalyp otyr. Jyl saıyn óndiriste 200 adamnyń ómiri qıylady jáne 1000-nan astam adam zardap shegedi.
Eńbek qorǵaý salasyndaǵy ótemaqyǵa negizdelgen basqarý modeli bolar is bolǵannan keıin áreket etýge baǵyttalǵan. Naqty sheshim tekserýler qorytyndysynan keıin ǵana shyǵarylady. Tsıfrlyq ekonomıka jaǵdaıynda mundaı model jumys istemeıdi. Bizge qubylmaly jaǵdaıǵa qaraı jyldam áreket etetin model kerek. Osy turǵydan alǵanda Eńbek qaýipsizdiginiń jańa tujyrymdamasy qajet-aq», - deıdi federatsııa jetekshisi.
Uıym basshysy keıbir sala mamandaryna 55 jasqa kelgennen keıin zeınetke shyqqansha arnaıy áleýmettik tólemaqy berý sharasynyń engizilýi de eńbek naryǵyndaǵy jaǵdaıǵa oń áser etedi dep otyr.
«Prezıdent aıtqan mamandar tapshylyǵy shynymen de ózekti másele. Ol úshin kásiptik bilim berý júıesin zamannyń yńǵaıyna, ár saladaǵy jańashyldyqtarǵa beıimdeı túsý qajet», - deıdi Satybaldy Dáýletalın.
