Eń tómengi jalaqyny 150 myń teńgege jetkizý: ádisteme qashan daıyn bolady
ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaev eń tómengi jalaqyny 150 myń teńgege deıin kóterý josparyna qatysty pikir bildirdi.
- Bul másele jyl aıaǵyna deıin pysyqtalady, sebebi osyny talqylaý is-qımyl josparyna engizilgen. Sondyqtan tıisti merzim aıqyndaldy jáne onyń aıasynda jyl sońyna deıin talqylanady, - dedi A.Ertaev Úkimettegi baspasóz máslıhatynda.
Bul turǵyda tilshiler «Jyl sońynda eń tómengi jalaqy arta ma?» dep naqtylap surady.
- Ol jaıynda naqty aıta almaımyn, sebebi jyl aıaǵyna deıin tıisti ádisteme ǵana aıqyndalýy múmkin. Ekinshiden, onyń qanshalyqty kóteriletini belgilenýi tıis. Osydan keıin bıýdjet protsesi bar, buǵan da ýaqyt kerek, - dedi mınıstr.
Onyń sózine qaraǵanda, jańa ádisteme eń tómengi jalaqyny kóterýge baǵyttalyp otyr.
Eske salsaq, jaqynda Ulttyq ekonomıka mınıstriniń birinshi orynbasary Azamat Ámrın Úkimettiń aldynda eń tómengi jalaqyny 150 myń teńgege deıin kóterý mindeti turǵanyn aıtqan bolatyn.
