Eń tómengi jalaqy mólsheri jáne memlekettik qyzmetkershilerdiń jalaqysy óse me
ASTANA.KAZINFORM — QR Parlamenti Palatalarynyń birlesken otyrysynan keıingi brıfıngte Premer-mınıstrdiń orynbasary — Ulttyq ekonomıka mınıstri Serik Jumanǵarın kelesi respýblıkalyq bıýdjet jobasynda aılyq tabysty kóterý máselesi qaralýy múmkin ekenin málimdedi.
Onyń sózinshe, áli naqty sheshim qabyldanbaǵan.
— Kelesi bıýdjette eń tómengi jalaqy mólsherin kóterýdi qarastyratyn shyǵarmyz. Ázirge qanshaǵa jáne qalaı ósetini naqtylanady. Memlekettik qyzmetshiler men jalaqysyn bıýdjetten alatyn azamattardyń aılyq tabysyn kóterýdi de qarastyrýymyz múmkin, — dedi Serik Jumanǵarın.
Biraq onyń sózinshe, jalaqynyń kóterilýi avtomatty túrde halyqtyń ál-aýqatyn jaqsartpaıdy.
Sońǵy bes jylda memleket azamattardyń aılyq tabysyn joǵarylatqanmen, onymen qatar ınflıatsııa da kúsheıdi.
— Birneshe jyl buryn bıýdjet qyzmetkerleriniń jalaqysyn 30%-ǵa kóterdik. Ekonomıkanyń ártúrli sektorlaryndaǵy basqa mamandardyń da aılyq tabysyn ósirdik. Demek, tek jalaqyny arttyrýmen másele sheshilmeıdi. Ekonomıka sektorlarynda eńbek ónimdiligin joǵarylatý kerek. Sonymen birge, turaqty jumys oryndaryn quryp, adamı kapıtaldyń deńgeıin ósirý qajet, — dedi vıtse-premer.
Onyń aıtýynsha, Úkimet daıyndaǵan halyq tabysyn arttyrý boıynsha keshendi josparda negizgi alty bólim bar. Olarda jalaqyny kóterý ǵana emes, eńbek naryǵyn jetildirý sharalary da qamtylǵan.
Aıta keteıik, buǵan deıin jańa jumys oryndary jáne jalaqynyń ósýi memlekettiń jeńil ónerkásipti qoldaýynyń mindetti sharty ekenin jazǵanbyz.
