Eń tómengi jalaqy men zeınetaqy mólsheri eki ese ósti — Ulttyq ekonomıka mınıstrligi
ASTANA. KAZINFORM — Ulttyq ekonomıka mınıstrligi 2019-2026 jyldar aralyǵynda elimizde negizgi áleýmettik tólemder aıtarlyqtaı óskenin málimdedi.
Atap aıtqanda:
- Eń tómengi jalaqy (ETJ) 2 ese ósip, 42,5 myń teńgeden 85 myń teńgege deıin ulǵaıdy;
- Eń tómengi zeınetaqy mólsheri shamamen 2 ese ósip, 36,1 myń teńgeden 69 myń teńgege deıin jetti;
- Jan basyna shaqqandaǵy JІÓ 715,5 myń teńgeden 1 661,6 myń teńgege deıin joǵarylady.
Sonymen qatar, mınıstrlik bızneske arnalǵan jańa múmkindikter jóninde aqparat berdi.
— Óńirlerdegi jeke kásipkerlikti yntalandyrý maqsatynda shaǵyn qalalar men aýyldardy damytýǵa baǵyttalǵan uzaq merzimdi «Іsker aımaq» baǵdarlamasy iske qosyldy. 2029 jylǵa deıin baǵdarlama jalpy somasy 1,2 trln teńge bolatyn shamamen 15 myń bıznes-jobany qoldaıdy. Baǵdarlama aýyl sharýashylyǵy ónimderin óńdeýge, azyq-túlik óndirýge, jıhaz jáne qurylys materıaldaryn shyǵarýǵa, sondaı-aq qolónerdi damytýǵa basymdyq beredi. Respýblıkalyq deńgeıde bıznes-bastamalar «taza paraqtan» qaǵıdaty jáne «Órleý» jeńildetilgen kredıtteý baǵdarlamasy arqyly qoldaý tabady.
Basym salalarǵa, atap aıtqanda óńdeý ónerkásibine, IT, týrızmge, kreatıvti ındýstrııaǵa jáne logıstıkaǵa jyldyq mólsherlemesi 12,6%-dan aspaıtyn, 7 mlrd teńgege deıingi qarjylandyrý lımıtteri belgilengen, — dep málimdedi QR UEM.
Aıta keteıik, buǵan deıin 177 myńǵa jýyq bıznes-jobaǵa 10 trln teńgeden astam jeńildetilgen nesıe men sýbsıdııa beriletinin jazǵanbyz.
