Eń tómengi jalaqy kóterý aýyrtpalyǵy jeke kásipkerlerge túsedi — Májilis depýtaty

ASTANA. KAZINFORM — Eń tómengi jalaqy kóterý aýyrtpalyǵy jeke kásipkerlerge túsedi. Mundaı pikirdi Jibek Joly telearnasynyń «Ýáde» baǵdarlamasyna bergen suhbatynda Májilis depýtaty Elnur Beısenbaev bildirdi. 

Onyń atap ótýinshe, osy kúnge deıin eń tómengi jalaqy Memleket basshysynyń tapsyrmasyna oraı Úkimet qaýlysymen rettelip keldi. Endigi ýaqytta arnaıy ázirlengen ádisnama aıasynda Úkimet belgilengen mejege qol jetkizilgen jaǵdaıda kelesi jyldan bastap eń tómengi jalaqyny kóterýge múddeli bolady. 

Elnur Beısenbaev Amanat partııasynyń saılaýaldy baǵdarlamasynda eń tómengi jalaqyny jyl saıyn kóterý týraly ýádesi bolǵanyn da jasyrmady.

— 2 jyldyń ishinde 2 esege kóterildi. Biz taǵy da sondaı usynys beremiz. Osy joly da Joldaýǵa usynysymyzdy berdik. Memleket basshysy qoldasa jaqsy bolar edi. Jalpy, eń tómengi jalaqynyń ósýi Úkimetke, Parlamentke eshqandaı aýyrlyq tıgizbeıdi. Memlekettik qyzmette ne bolmasa memlekettik bıýdjetten jalaqy alatyn qyzmetkerlerdiń arasynda eń tómengi jalaqy alatyn mamandar joq deýge bolady. 100-120 myń teńge kóleminde jalaqy alatyndar bar. 85 myń teńge jalaqy alatyndardyń kópshiligi — jeke sharýashylyqta júrgen azamattar. Solardyń ekonomıkalyq jaǵdaıyna, tólemderine aýyrtpalyq túsirýi múmkin. Sol úshin Úkimet saraptama jasaıdy. Mańyzdy aýyrtpalyq jeke kásipkerge túsedi. Sondyqtan Úkimet baıypty sheshim qabyldaýy tıis, — dedi Májilis depýtaty.

Buǵan deıin Elnur Beısenbaev el turǵyndary qandaı máselelerdi jıi kóteretinin aıtqan edi.