Eń tómengi jalaqy qashan kóteriledi — Jumanǵarın jaýaby
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın eń tómengi jalaqynyń kóterilý múmkindigine qatysty pikir bildirdi.
Búgin Quryltaı otyrysynan keıin ótken baspasóz máslıhatynda BAQ ókilderi vıtse-premerden eń tómengi jalaqy mólsheriniń qashan kóteriletindigin suraǵan edi. Saýalǵa jaýap bergen Serik Jumanǵarın bul másele Úkimet pen Prezıdent Ákimshiligi deńgeıinde talqylanyp jatqanyn atap ótti.
— Sondyqtan taıaý ýaqytta nátıjesi belgili bolady dep oılaımyn. Merzimin aıta almaımyn. Bul taıaý bolashaqtyń máselesi. Eger kóteriletin bolsa, onda kelesi jyly, — dedi vıtse-premer.
Aıta keteıik, Ulttyq ekonomıka mınıstrligi 2019-2026 jyldar aralyǵynda elimizde negizgi áleýmettik tólemder aıtarlyqtaı óskenin málimdegen edi.
Usynylǵan derekterge sáıkes, eń tómengi jalaqy 2 ese ósip, 42,5 myń teńgeden 85 myń teńgege deıin ulǵaıdy. Eń tómengi zeınetaqy mólsheri shamamen 2 ese ósip, 36,1 myń teńgeden 69 myń teńgege deıin jetti. Jan basyna shaqqandaǵy JІÓ 715,5 myń teńgeden 1 661,6 myń teńgege deıin joǵarylady.
