Eń tómengi jalaqy almaý úshin ne isteý kerek — mınıstr keńesi

ASTANA. KAZINFORM — Eńbek jáne halyqty áleýmettik qorǵaý mınıstri Svetlana Jaqypova tabysy az qazaqstandyqtarǵa keńes berdi.

— Birinshiden, oqý kerek. Ekinshiden, eńbektenip, biliktilikti únemi arttyryp, joǵary jalaqy tólenetin jumysqa aýysý qajet. Eger adam jumys isteı almaıtyn jaǵdaıda bolsa, aýyryp qalsa nemese bala kútimi boıynsha demalysynda bolsa, bul jaǵdaıda memleket áleýmettik qoldaý kórsetedi, — dedi Svetlana Jaqypova Májilistiń jalpy otyrysynan keıin ótken baspasóz máslıhatynda.

Mınıstrdiń aıtýynsha, arnaıy áleýmettik járdemaqy tólenedi, tipti ataýly áleýmettik kómek te taǵaıyndalýy múmkin.

— Azamattar joǵaryda atalǵan jaǵdaıda bolsa, ýákiletti organdarǵa júginýi kerek. Ol jerde qajetti qujatty qalaı rásimdeý kerektigin túsindirip beredi, — dep tolyqtyrdy vedomstvo basshysy.

Buǵan deıin Svetlana Jaqypova biryńǵaı áleýmettik standart ázirlenetinin málimdegen edi. 

Búgin Májilis eń tómengi jalaqyny belgileý týraly zańdy qabyldady.