Eń tómengi jalaqy 2027 jyldan bastap 110 myń teńgege deıin kóteriledi
ASTANA.KAZINFORM – 2027 jylǵy 1 qańtardan bastap Qazaqstanda aılyq eńbekaqynyń eń tómengi mólsheri 110 myń teńgege deıin kóteriledi. Bul týraly Úkimet otyrysynda QR Ulttyq ekonomıka birinshi vıtse-mınıstri Azamat Ámrın málimdedi.
– Halyq tabysynyń artýy ekonomıkanyń turaqty sapaly ósýi jáne ınflıatsııanyń tómendeýi esebinen qamtamasyz etiledi. 2027 jylǵy 1 qańtardan bastap aılyq eńbekaqynyń eń tómengi mólsheri 110 myń teńgege deıin kóteriledi. Qajetti qarajatty bekitý jáne bólý kelesi úsh jyldyq kezeńge arnalǵan bıýdjette kózdeletin bolady, – dedi ol.
Onyń aıtýynsha, ınflıatsııany odan ári tómendetý úshin tarıftik saıasatpen qatar baǵanyń ósýin tejeý sharalary kúsheıtiledi. Azamat Ámrın shaǵyn jáne orta bıznesti qoldaý baǵytynda da birqatar shara qabyldanatynyn atap ótti.
– Kásipkerlerdi irilendirýdi yntalandyrý úshin Orta bıznesti damytý jospary ázirlenedi. Qujatta uzaq merzimdi qarjylandyrý, tehnologııalyq jańǵyrtý, bızneske ákimshilik qysymdy báseńdetý tetikteri kórsetiledi, – dedi ol.
Sonymen qatar 2027 jylǵy 1 qańtardan bastap mıkro jáne shaǵyn kásipkerlik sýbektilerin tekserýge jáne profılaktıkalyq baqylaýǵa úsh jyldyq moratorıı engizý máselesi qaralady.
– Halyqtyq tsıfrlyq ekonomıkany qurý sheńberinde kásipkerlikti memlekettik qoldaý sharalary marketpleısterdi, bankterdi jáne logıstıkany qosa alǵanda, tsıfrlyq servısterdiń múmkindikterimen biriktiriletin bolady, – dep tolyqtyrdy ol.
Salyq zańnamasyn jetildirý máselesine toqtalǵan A.Ámrın Salyq kodeksine engiziletin ózgerister paketi ázirlengenin aıtty.
– Búgingi tańda bıznes-qoǵamdastyq ókilderiniń usynystaryn eskere otyryp, Salyq kodeksine naqty ózgerister paketi ázirlendi. Іri kapıtal ıeleri úshin joǵarylatylǵan mólsherleme engizý máselesi halyqaralyq tájirıbeni taldaýdy eskere otyryp qarastyrylady, – dedi ol.
Budan bólek, ınfraqurylymdyq jobalardy qarjylandyrý jáne bıýdjet qarajatynyń maqsatty paıdalanylýyn baqylaý tetikteri jetildiriledi. Negizsiz jáne tıimsiz shyǵyndardyń aldyn alý úshin jasandy ıntellekt tehnologııalaryn qoldaný josparlanyp otyr. Sonymen qatar ol ınvestıtsııalyq ahýaldy jaqsartý baǵytyndaǵy jumystarǵa da toqtaldy.
– 2027 jylǵy qańtardyń sońyna deıin atalǵan túzetýler Quryltaıdyń qaraýyna engiziledi, – dedi Ámrın «Alataý qalasynyń arnaıy quqyqtyq rejımi týraly» Konstıtýtsııalyq zańǵa ázirlengen túzetýler týraly.
Sonymen qatar «Báıterek» holdıngine ınvestıtsııalyq saıasat salasynda qosymsha fýnktsııalar berý kózdelgen. Memlekettik basqarý júıesin reformalaý týraly aıta kele, ol memlekettik apparat jumysynyń tıimdiligin arttyrýǵa, tsıfrlandyrýǵa jáne jasandy ıntellektimen ózara is-qımyl jaǵdaıynda jumys isteýge beıimdelýge basymdyq beriletinin atap ótti.
– Quqyqtyq jáne qarjylyq sıpattaǵy sharalar qabyldanyp, jańa ekonomıka jaǵdaıynda memlekettik basqarý júıesin reformalaýdyń keshendi jospary ázirlenedi, – dedi ol.
Aıta keteıik, Úkimet Prezıdent Joldaýyn iske asyrý sharalaryn qarastyrady.
