Eń taqýa musylmandar qaı elde?
ASTANA. 6 qyrkúıek. QazAqparat - AQSh-tyń «A Pew Research Center» áleýmettik ortalyǵynyń zertteýine qaraǵanda eń dindar musylmandar Indonezııada, Malaızııada jáne Taılandta turatyn bolyp shyqty.
QMDB saıtyndaǵy málimetterge qaraǵanda, áleýmettik saýalnamaǵa álem boıynsha 35 myń musylman qatysqan. Ár aýmaq boıynsha shamamen 5 myńdaı múmin áleýmettanýshylardyń suraqtaryna jaýap bergen. Suraqtardyń negizi musylmannyń sharıǵı mindetterdi qanshalyqty oryndaýyna baılanysty boldy. Sonymen, keıbir zertteý nátıjeleriniń qorytytyndysymen oqyrmandardy tanystyra keteıik:
Suralǵan ındonezııalyqtardyń 98 paıyzy, malaızııalyqtar men taılandtyqtardyń 93 paıyzy turaqty túrde zeketterin tóleıdi eken. Al, malaızııalyqtar men ındonezııalyqtardyń 99 paıyzy, taı musylmandarynyń 100 paıyzy oraza ustaıtyn bolyp shyqty. Eń kóp meshitke baratyndar da - ındonezııalyqtar. Olardyń 72 paıyzy qulshylyq úıine baryp, ǵıbadat jasaıtyndyqtaryn aıtqan. Salystyrmaly túrde aıtatyn bolsaq, malaızııalyqtardyń 57 paıyzy, mysyrlyqtardyń 71 paıyzy, túrkııalyqtardyń tek 44 paıyzy ǵana keminde bir ret meshitke at basyn burady eken.
