Eń symbatty premer-mınıstr Naýryz merekesimen quttyqtady

ASTANA. QazAqparat - Kanadanyń premer-mınıstri, álemdegi eń symbatty saıasatkerdiń biri ataǵyn ıemdengen Djastın Trıýdo kanadalyqtardy Naýryz merekesimen quttyqtady, dep habarlaıdy QazAqparat.

Saıasatta da, áleýmettik jelide de óte belsendi Trıýdo arnaıy vıdeo túsirip, Naýryz merekesiniń tarıhyna toqtalǵan.

«Jeke óz atymnan jáne áıelim Sofıdiń atynan barlyq kanadalyqtardy Naýryz merekesimen quttyqtaımyn. Parsy kúntizbesi boıynsha bul Jańa jyldyń bastaýy. Bul kúni túgel otbasy men dos-jarandar jınalyp, bir-birine syılyq jasaıdy, dámdi tamaq iship, mýzyka tyńdaıdy. Bıyl Kanada 150 jyldyǵyn toılamaq. Sondyqtan, biz elimizdegi kóp mádenıetti, kóp til men senim-dástúrdi toılaý úshin kez kelgen múmkindikti paıdalanaýymyz kerek. Bul jan-jaqtylyq bizdiń elimizdi nyǵaıtyp, baıyta túsedi. Naýryz qutty bolsyn»,-dedi Kanada premeri óziniń quttyqtaýynda.

Aıta keteıik, Djastın Trıýdo - Kanadanyń tarıhyndaǵy ekinshi eń jas premer-mınıstr. 2015 jyly parlamenttik saılaýda Trıýdo basqaratyn Lıberaldy partııa jeńiske jetip, ol 4 qarasha kúni Kanadanyń Premer-mınıstri bolyp taǵaıyndaldy. Djastın Trıýdo - Kanadanyń on besinshi premer-mınıstri Per Trıýdonyń úlken uly.