«Eń sulý» qazaqstandyq fılmi prokatqa shyqty
ASTANA. QazAqparat - Rejısser Qanaǵat Mustafın túsirgen «Eń sulý» kınokomedııasy 10 mamyrdan bastap prokatqa shyǵady. Atalǵan fılmdi QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» kınostýdııasy men «Kanaidarproduction» kompanııasy túsirgen, dep habarlaıdy QazAqparat tilshisi otandyq kınostýdııanyń baspasóz qyzmetine silteme jasap.
«Bul kınotýyndy «16 qyz» fılminiń jalǵasy emes. Jańa fılm. Romantıkalyq komedııa janrynda túsirilgen «16 kyz» fılminde basty eki keıipker ǵana bolsa, jańa fılmde toǵyz negizgi keıipker bar. Janry jaǵynan krımınaldy komedııaǵa jaqyn. Bul «16 qyz» fılminiń keıipkerleri qatysatyn otbasylyq kórsetilimge arnalǵan fılm, - deıdi rejısser Qanaǵat Mustafın.
Fılmniń jelisi boıynsha kartınanyń basty keıipkeri Samat otyzdan assa da áli kúnge deıin otbasyn qurmaǵan súrboıdaq. Jan dosyn úılendirýdi kózdegen Baýyrjan Samatpen birge qalyńdyq izdep qalaǵa attanady. Osy jolda eki dos qyzyqty da shytyrman oqıǵalardy bastan ótkizedi. Fılmdegi oqıǵa 80 mln. teńge turatyn Tsın áýletiniń XIV ǵasyrdaǵy qumyranyń Ulttyq murajaıdan urlanýymen qosa órbıdi.
«16 qyz» fılminiń basty keıipkerleri - Asha Mataı men Berik Aıtjanovtan basqa jeti negizgi keıipker bar. Olardy Ǵanı Quljanov, Asan Májıt, Farhat Ábdiraıymov, Murat Bısembın jáne basqalar somdaıdy. Aıta ketelik, fılmde komedııalyq akter retinde alǵash kınoǵa túsken ártister de bar. Olar: akter Qýanysh Doldaev, bloger telejúrgizýshi Ásel Asqar, tele-radıo júrgizýshi, shoýmen Qazybek Qasym jáne ánshi Kental (Talǵat Kenjebolatov).
Túsirilim jumystary Almaty jáne qalaǵa jaqyn mańda júrgen. Tonaý sahnalary úshin fılmniń qoıýshy-sýretshisi Nurbolat Qulmuhambetov Tsın áýleti qumyrasynyń toǵyz kóshirmesin jasaǵan.
