Eń ozyq tehnologııalardy engizýden bas tartqan kompanııalarǵa eksport shektelýi múmkin

ASTANA. KAZINFORM – Eń ozyq qoljetimdi tehnologııalardy (EQT) engizbegen kompanııalar óz ónimin eksporttaýda shekteýlerge tap bolýy múmkin. Bul týraly Senat depýtaty, Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń hatshysy Olga Býlavkına aıtty.

Depýtattyń aıtýynsha, ekologııalyq jańǵyrtýdan bas tartý uzaqmerzimdi perspektıvada óndiris shyǵyndarynyń artýyna alyp keledi. Bul ınflıatsııa men ekologııalyq normalardyń qatańdaýyna baılanysty. Sonymen birge, Qazaqstannyń ekologııalyq saıasatyna halyqaralyq áriptesterdiń senimi azaıýy múmkin. Bul eldi «jasyl» halyqaralyq bastamalardan shyǵaryp, ornyqty qarjylandyrýǵa qoljetimdilikti shekteýge ákeledi.

Olga Býlavkına bıylǵy qańtar aıynda Úkimet otyrysynda EQT engizý men keshendi ekologııalyq ruqsatty berý merzimi 2025 jyldan 2031 jylǵa shegerilgenin eske saldy.

Onyń aıtýynsha, bul sheshim ótpeli kezeńge arnalǵan naqty jospar men kompanııalardyń bul ýaqytty syltaý retinde paıdalanbaıtynyna kepildik bolǵan jaǵdaıda ǵana negizdelgen sheshim bola alady. Áıtpese, el ekologııalyq daǵdarysqa, ekonomıkalyq shyǵyndarǵa jáne ónerkásiptik óńirlerde áleýmettik shıelenistiń artýyna tap bolýy múmkin.

Aıta keteıik, bıyl eldegi 50 iri kásiporyn eń ozyq qoljetimdi tehnologııalardy engizip, keshendi ekologııalyq ruqsat alýǵa mindetti. Al 2031 jyldan bastap bul talap birinshi sanattaǵy barlyq kásiporynǵa qoldanylady. Talap oryndalmaǵan jaǵdaıda ekologııalyq tólem 2, 4 jáne 8 ese ulǵaıady.