«Eń myqty» telejobasynyń jeńimpazy anyqtaldy
ASTANA. KAZINFORM — «Jibek Joly » telearnasynyń «Eń myqty» telejobasy máresine jetti. Jumysshy mamandyqtar jyly aıasynda uıymdastyrylǵan aýqymdy jobanyń maqsaty — qarapaıym eńbek adamynyń bedelin arttyrý, el damýyna qosqan úlesin eleý edi.
Mundaı formattaǵy teleshoý otandyq televızııa tarıhynda bolmaǵan. «Eń myqty» — amerıkalyq Tough as Nails baǵdarlamasyna uqsaıdy.
Bul jobada mamandardyń kásibı mashyǵy, qarymy men qabileti, tózimi, ekstremaldy synaqtarǵa daıyndyǵy synaldy. Nátıjesinde adam minezin, qajyr-qaıratyn, erik-jigerin janıtyn, kásibı sheberligin kórsetetin teleshoý paıda boldy.
Segiz epızod boıy Qazaqstannyń túkpir-túkpirinen kelgen 20 qatysýshy kúrdeli fızıkalyq jáne psıhologııalyq synaqtardan ótti. Olar — metallýrg, elektrık, slesar, elektromonter, dánekerleýshi, shef-povar, jol sheberi jáne jol monteri sııaqty túrli jumysshy mamandyqtarynyń ókilderi.
Telejoba Almaty oblysyndaǵy Qapshaǵaı sý qoımasynyń jaǵasynda túsirilgen. Tabıǵattyń kórkem kórinisi shoýdy áserli ete tústi. Jobany tanymal jýrnalıst Dına Tólepbergen júrgizdi. Onyń kásibı sheberligi ár qatysýshynyń bitim-bolmysyn ashyp, ár kezeńniń dramatızmin kúsheıtti.
Qatysýshylar óte qıyn synaqtardan ótti. Mysaly fınalda serfıng taqtasynyń ústinde tik turyp, aǵysy qatty ózenniń arǵy betine jetýi tıis boldy. 10 metrlik bórenede tepe-teńdik saqtap, terbelip turǵan ot sharlar ortasynan ótti. Bir qolymen bıikke órmeledi.
Osyndaı tartysty jobanyń fınalyna 6 adam ótti. Nátıjesinde «Almaty elektr ortalyǵy» AQ-nyń №7 týrbınalyq tsehynyń aǵa mashınısi Aıdos Masıralıev jeńimpaz atandy. Ol elimizdiń «Eń myqty» azamaty atanyp qana qoımaı, Astanadan páterge ıe boldy.