Eń mańyzdysy — onyń bostandyqqa shyqpaýy: Nuraı Serikbaıdyń otbasy sot úkimi týraly
ShYMKENT. KAZINFORM — Sherhan Aımahanǵa ómir boıyna bas bostandyǵynan aıyrý jazasy taǵaıyndalǵannan keıin Nuraı Serikbaıdyń otbasy sot úkimine qatysty pikir bildirip, is boıynsha aldaǵy josparyn aıtty.
Qaza tapqan qyzdyń týystary osy ýaqyt ishinde materıaldyq ótemaqy máselesin basty maqsat etpegenin jetkizdi. Olar úshin bastysy — sottalǵan adamnyń bostandyqqa qaıta shyqpaýyn kózdegen jaza bolǵan.
Úkim jarııalanǵannan keıin Nuraıdyń anasy kóz jasyna erik berip, oıyn áreń jetkizdi. Otbasy kútken ómir boıǵy jaza taǵaıyndalǵanymen, qyzynan aıyrylǵan ana úshin eshbir jaza onyń ornyn toltyra almaıdy.
— Budan basqa jaza joq. Ol ómir boıyna sottalyp, endi bostandyqqa shyqpaýy kerek. Biraq mundaı jazaǵa da ol laıyq emes, óıtkeni ol áli ómir súrip jatyr, — dedi Nuraıdyń anasy.
Marqumnyń aǵasy Sultan otbasy áýel bastan ómir boıyna bas bostandyǵynan aıyrý jazasyn taǵaıyndaýdy talap etkenin aıtty. Onyń sózinshe, qyzdyń qaza bolǵanynan keıingi segiz aı tergeýge, dálelder jınaýǵa jáne sot protsesine arnaldy. Otbasy úshin basty másele materıaldyq ótemaqy emes, sottyń ádil sheshimi bolǵan.
— Materıaldyq máselelerdi ekinshi orynǵa qoıamyz. Eń bastysy — ómir boıyna bas bostandyǵynan aıyrý jazasy. Biz úshin eń mańyzdysy osy boldy. Árıne, dál osyndaı jaza taǵaıyndalady dep kúttik. Maqsatymyzǵa jettik. Biraq alda apellıatsııa bar, keıin kassatsııa bolýy múmkin. Biz oǵan mindetti túrde daıyndalamyz, — dedi Sultan.
Іstiń birinshi satydaǵy sotta qaralýy aıaqtalǵanymen, otbasy quqyqtyq kúres aıaqtaldy dep eseptemeıdi. Úkim áli zańdy kúshine engen joq. Nuraıdyń týystary qorǵaý tarapynyń úkimge shaǵymdanýy múmkin ekenin eskerip otyr.
Sultan sot taǵaıyndaǵan ótemaqy otbasy úshin negizgi másele bolmaǵanyn taǵy da aıtty.
— Biz úshin aqsha basty másele emes. Eń mańyzdysy — onyń bostandyqqa shyqpaýy, — dedi marqumnyń aǵasy.
Sultan anasynyń sot sheshimin qalaı qabyldaǵanyn da aıtyp berdi. Onyń aıtýynsha, úkim jarııalanǵannan keıin anasy onyń zańdyq mánin birden uǵyna almaǵan.
— Anam bolǵan jaǵdaıdy ázirge tolyq túsingen joq, oǵan bárin zań turǵysynan túsindirý kerek. Biraq ol, árıne, ómir boıyna bas bostandyǵynan aıyrý jazasy taǵaıyndalady dep kútti. Bárimiz osyǵan úmit arttyq jáne osyndaı sheshimge daıyndaldyq. Biz úshin eń bastysy — kúsh-jigerimizdiń zaıa ketpegeni, — dedi ol.
Sultan úkim jarııalanǵan kezde Sherhan Aımahannyń áreketin arnaıy baqylaǵanyn jetkizdi. Marqumnyń aǵasynyń sózinshe, sot ómir boıyna bas bostandyǵynan aıyrý jazasyn taǵaıyndaǵan kezde ol eshqandaı reaktsııa tanytpaǵan.
— Men oǵan ádeıi qarap otyrdym. Eshqandaı emotsııa joq. Ol óziniń isin túsinbeıdi jáne múldem moıyndamaıdy. Tipti kinásin sezinbeıdi, — dedi Sultan.
Jýrnalıster Nuraıdyń týystaryna qaıǵyly jaǵdaıdan keıin Sherhan Aımahannyń otbasy keshirim surady ma dep saýal qoıdy. Sultannyń aıtýynsha, olar shynaıy keshirim suramaǵan.
— Olar bizden shyn nıetimen keshirim suramady. Eń basynda bir ret keldi, olardy bizdiń týystarymyz qarsy aldy. Alaıda shynaıy keshirim aıtylǵan joq, — dedi ol.
Sherhan Aımahan úkim jarııalanar aldynda sońǵy sózin sóılegen bolatyn. Ol Nuraıdyń ata-anasy men aǵalarynan keshirim surap, bolǵan jaǵdaıǵa ókinetinin aıtty. Onyń sózinshe, kisi óltirgen sáti esinde joq.
Úkimdi ádil dep sanaımyn — advokat
Jábirlenýshi taraptyń ókili Aıanhan Omarov sot sheshimin zańdy, obektıvti jáne ádil dep baǵalady. Onyń aıtýynsha, úkim shyǵarylǵanǵa deıin birneshe aı boıy jumys júrgizilip, jábirlenýshi tarap dálelderdi jınaýǵa jáne olardy protsessýaldyq turǵydan bekitýge kúsh salǵan.
— Úkim zańdy, obektıvti ári ádil shyǵaryldy dep sanaımyn. Bul — bizdiń eńbegimizdiń nátıjesi. Jeti-segiz aı boıy osyǵan qol jetkizýge, Sherhan Aımahannyń kinásin dáleldeýge tyrystyq, — dedi Aıanhan Omarov.
Sonymen qatar advokat birinshi satydaǵy sottyń sheshimin ázirge is boıynsha sońǵy núkte dep sanaýǵa bolmaıtynyn atap ótti. Taraptarǵa apellıatsııalyq shaǵym berý úshin 15 táýlik berilgen.
— Úkim áli zańdy kúshine engen joq. Ár taraptyń 15 kún ishinde apellıatsııalyq shaǵym berýge quqyǵy bar. Meniń oıymsha, sońǵy núkteni apellıatsııalyq satydaǵy sot qoıady. Óıtkeni qorǵaý tarapy sot úkimimen kelispeıdi, sondyqtan apellıatsııalyq shaǵym berýi múmkin, — dedi advokat.
Azamattyq talap pen moraldyq zııan úshin belgilengen ótemaqy mólsherine qatysty Omarov jábirlenýshi tarap sot sheshiminiń bul bóligine shaǵymdana ma, joq pa, ázirge naqty aıta almaıtynyn jetkizdi.
— Bul másele boıynsha qazir naqty eshteńe aıta almaımyn. Nuraıdyń otbasymen keńesýim qajet. Jalpy, óz basym úkimge kóńilim tolady, — dedi Aıanhan Omarov.
Qorǵaý tarapy úkimdi zerdeleıdi
Sherhan Aımahannyń qorǵaý tarapy sot sheshimimen tolyq kelispeıtinin málimdedi. Advokattar úkim mátinin alǵannan keıin onymen tanysyp, apellıatsııalyq shaǵym berý máselesin sheshedi.
— Úkimmen ishinara kelispeımiz. Úkimdi zerdelep, apellıatsııalyq shaǵym berý máselesin sheshemiz, — dedi Sherhan Aımahannyń advokaty Esbolat Qurmanbaev.
Osylaısha, qylmystyq istiń birinshi satydaǵy sotta qaralýy aıaqtaldy, alaıda sot protsesi apellıatsııalyq satyda jalǵasýy múmkin.
Nuraıdyń otbasy úshin 13 tamyzdaǵy basty nátıje — týystarynyń aıtýynsha, tergeý bastalǵannan beri talap etip kelgen Sherhan Aımahanǵa ómir boıyna bas bostandyǵynan aıyrý jazasynyń taǵaıyndalýy.
Buǵan deıin habarlanǵandaı, 13 tamyzda Shymkent qalasynyń qylmystyq ister jónindegi mamandandyrylǵan aýdanaralyq soty Sherhan Aımahandy Nuraı Serikbaıdy asa qatygezdikpen óltirgeni, ony kúshtep áketkeni jáne ańdyǵany úshin kináli dep tanydy.
Qylmystyq quqyq buzýshylyqtardyń jıyntyǵy boıynsha Sherhan Aımahan ómir boıyna bas bostandyǵynan aıyrý jazasyna kesilip, jazasyn qylmystyq-atqarý júıesiniń joǵary qaýipsizdik mekemesinde óteıtin boldy.
Sot sondaı-aq jábirlenýshi taraptyń azamattyq talabyn ishinara qanaǵattandyrdy. Aımahannan moraldyq zııan úshin 25 mln teńge jáne advokat qyzmetine jumsalǵan shyǵyn retinde 5 mln teńge óndirildi. Materıaldyq zalaldy óteý týraly talap qaraýsyz qaldyrylyp, otbasynyń bul talappen azamattyq sot isin júrgizý tártibimen júginý quqyǵy túsindirildi.
