Eń las aýa qaı qalada?
ASTANA. QazAqparat - Nıý-Delı - aýanyń lastaný deńgeıi álem boıynsha eń joǵarǵy kórsetkishke ıe qala.
Bul týraly Dúnıejúzilik densaýlyq saqtaý uıymy málimdedi, dep jazady «Habar» arnasy. Halyqaralyq uıym mundaı tujyrymǵa álemniń 91 elindegi aýa sapasyn teksergennen keıin keldi. Atalǵan tekserý dúnıe júzi boıynsha 1600 qala men eldi mekende júrgizilgen. Mamandardyń málimdeýinshe, Úndistan astanasy Nıý-Delıdiń aýasyndaǵy kólemi 10 mıkron bolatyn las bólshekter mólsheri 1 kýb metrge 153 mıkrogramdy kórsetken. Alaıda atalǵan qalanyń bılik ókilderi bul kórsetkishpen múlde kelispeıdi. Olardyń osyǵan qatysty keltirgen derekterine sáıkes, qaladaǵy otteginiń lastaný deńgeıi 1 kýb metrge 110 mıkrogramdy ǵana quraıdy. Al ǵalymdardyń málimdeýinshe, aýanyń tipti osyndaı mólsherde las bolýynyń ózi mundaǵy turǵyndardyń densaýlyǵy úshin qaýipti. Sebebi bul kezde júrek pen tynys joldarynyń sozylmaly aýrýlarymen naýqastaný qaýpi artady. «Olardyń arasyndaǵy eń qaterlisi - ókpe obyry», - deıdi dárigerler.
