Eń qymbat janarmaı baǵasy Norvegııada tirkeldi
ASTANA. 25 sáýir. QazAqparat - Álemdegi eń iri munaı shyǵaratyn elderdiń biri Norvegııa janarmaı baǵasy eń qymbat eýropalyq el atanyp otyr.
Sáýirdiń ortasynda berilgen málimet boıynsha, janarmaıdyń bir lıtri bul elde 1,86 eýro boldy, dep habarlaıdy Eýrazııa birinshi arnasy .
Drive Alive saıtynyń reıtıngisine sáıkes, tizimdegi ekinshi orynda Italııa tur, ondaǵy janarmaıdyń standarttyq baǵasy 1,83 eýrony quraıdy. Úshtikti Danııa memleketi tuıyqtaıdy, onda janarmaıdyń bir lıtriniń baǵasy - 1,77 eýro.
Batys Eýropadaǵy eń arzan janarmaı baǵasy Ispanııada tirkeldi, onda janarmaıdyń bir lıtri 1,38 eýrony quraıdy. Lıýksembýrg pen Polshada - 1,47 eýro, al Latvııa men Chehııada - 1,48 eýro.
Germanııada 95-shi úlgidegi janarmaıdyń bir lıtri kóptegen janarmaı beketterinde 1,70 eýrodan astam baǵaǵa satylýda. Aıta keteıik, GFR-de qazirgi tańda janarmaıdyń ári qaraı sharyqtaýyn toqtatý úshin sharalar qabyldaý kerektigi jóninde jáne tutynýshylardyń quqyǵyn qorǵaýǵa baılanysty talqylaý júrip jatyr.
«Janarmaı baǵasynyń budan ári ósýi nemis ekonomıkasy úshin qolaısyz» dep esepteıdi Germanııa saýda-ónerkásip palatasynyń Federaldi birlestigi (DIHK). «Baǵanyń kórsetkish taqtasynda 2 eýro dep jazylyp turǵan kezde, konıýnktýra shaıqala bastaıdy», - dep málimdedi DIHK basshysy Hans-Haınrıh Drıftman.
Budan burynyraq «Lýkoıl» munaı óndirýshi kompanııasynyń basshysy Vagıt Alekperov janarmaıdyń álemdik baǵasyn salystyra kele, «qazir Reseıde janarmaıdyń bir lıtri kez kelgen dúńgirshektegi bir bótelke sýdan da arzan» dep málimdegen bolatyn.
