Eń kóp salynǵan qurylys nysany boıynsha Astana men Almaty kósh bastap tur
ASTANA. KAZINFORM – 2024 jylǵy qańtar-sáýir aralyǵynda 9 597 nysan paıdalanýǵa berildi. Bul týraly Ulttyq statıstıka bıýrosynyń baspasóz qyzmeti málimdedi.
«2024 jyldyń 4 aıynda oryndalǵan qurylys jumystarynyń jalpy kólemi 1,2 trln teńgeni qurady, bul byltyrǵy jyldyń tıisti kórsetkishinen 12,2% artyq», - delingen habarlamada.
Oryndalǵan merdigerlik jumystardyń ishinde qurylys jumystarynyń jalpy kólemindegi eń úlken úles salmaq turǵyn emes ǵımarattardyń qurylysyna tıesili — 24,3%.
Budan keıin turǵyn úılerdiń qurylysy — 14,9%.
Úshtikke joldar men avtomobıl joldarynyń qurylysy da kiredi — bul jumys túrleriniń úles salmaǵy 10,9%.
Óńirler bólinisinde oryndalǵan qurylys jumystarynyń (qyzmetteriniń) eń kóp kólemi Atyraý oblysyna tıesili — 268 mlrd teńge, alaıda bul kórsetkish ótken jyldyń sáıkes kezeńinen 6,3% kem. Sondaı-aq oryndalǵan jumystar kólemi boıynsha Astana (127,4 mlrd teńge) jáne Almaty (118,7 mlrd teńge) qalalary kósh bastap tur.
2024 jyldyń qańtar-sáýir aılarynda paıdalanýǵa berilgen nysandar sany 9 597 birlikti qurady. Onyń ishinde 92% — turǵyn úıler, 2% — saýda obektileri, 1% — keńseler, 4% — obektilerdiń basqa da túrleri.
