Eń kóp órt oqıǵalary tirkelgen 4 oblys anyqtaldy
ASTANA. QazAqparat - Búgin Parlament Májilisindegi Úkimet saǵatynda Іshki ister mınıstri Qalmuhanbet Qasymov sońǵy úsh jyldaǵy órtke qatysty ahýaldy baıandady, dep habarlaıdy QazAqparat.
«Elimizde jalpy órt máselesi kúrdeli jaǵdaıda. Memlekettik órtke qarsy qyzmettiń jáne jergilikti atqarýshy organdardyń qabyldap jatqan sharalary aıtarlyqtaı nátıje bermeı otyr. Elimizde jyl saıyn 15 myńnan astam órt tirkeledi. 2015 jyldan búginge deıin órtten 3 319 adam zardap shekti, onyń ishinde 1 410 kóz jumdy. Tikeleı órtten kelgen materıaldyq zalal 12 mlrd teńgeni qurady», - dedi Q. Qasymov.
Onyń sózine qaraǵanda, eń kóp órt Almaty, Shyǵys Qazaqstan, Qaraǵandy jáne Qostanaı oblystarynda tirkeldi.
«Órtke qarsy qyzmettiń baqylaýymen qamtylǵan nysandarda qyzyl jalynnyń qaýpi aıtarlyqtaı tómen. Osy nysandarǵa elimizde oryn alǵan órttiń tek 10 paıyz ǵana úlesi tıesili. Órttiń basym bóligi memlekettik órtke qarsy qyzmettiń baqylaýymen qamtylmaǵan salalarda tirkelip otyr. Bul turǵyda turǵyn úı sektory, kólik, orman jáne dala órtterin atap ótken jón. Qazirgi kezde órttiń 70 paıyzyna deıin turǵyn úı sektorynda bolady. Oǵan qaýipsizdikke tıisti deńgeıde kóńil bólmeý, elektr qurylǵylardyń, peshterdiń aqaýlyǵy, sondaı-aq balalardyń otpen oınaýy sebep bolyp jatady», - dedi vedomstvo basshysy.
Sonymen qatar ol orman jáne dala alqaptardaǵy órt qaýipsizdigi problemasy erekshe nazardy talap etetinin atap ótti.
«Aýyl sharýashylyǵy mınıstrligi, orman sharýashylyǵy, jergilikti atqarýshy organdar quzyretindegi ormandy jerlerdi tilsiz jaýdan qorǵaý deńgeıi áli de tómen. Ótken úsh jylda elimizde eki myńnan astam tabıǵı órt tirkelip, 1,4 gektar jerdi sharpydy. Osy jyldary ormandy alqaptarǵa keltirilgen shyǵyn 674 mln teńgege baǵalandy. Órt kezinde 17 adamnyń ómiri qıylyp, 11 jaraqat aldy», - dedi Qalmuhanbet Qasymov.
