Elimizdiń qaı óńiri kitaphana sany boıynsha kósh bastap tur
ASTANA. KAZINFORM – 23 sáýirde atap ótiletin Ulttyq kitap kúnine oraı Qazaqstandaǵy kitaphanalar týraly negizgi statıstıkalyq málimetter usynyldy.
2025 jyldyń qorytyndysy boıynsha elimizde kópshilikke arnalǵan 3 912 kitaphana jumys istegen. Bul salada 10 myńnan astam adam eńbek etedi. Kitaphanalardyń 14-i jekemenshik, al basym bóligi – 3 343-i aýyldyq jerlerde ornalasqan.
Kitaphanalardyń qurylymyna kelsek, olardyń 3 866-sy ámbebap kitaphana bolsa, 20-sy ǵylymı, 19-y arnaıy jáne 7-eýi ózge baǵyttaǵy mekemeler. Balalarǵa arnalǵan 269 kitaphana bar.
Óńirler boıynsha eń kóp kitaphana Túrkistan oblysynda tirkelgen – 388. Odan keıin Batys Qazaqstan oblysy (359), Aqmola oblysy (341) jáne Qostanaı oblysy (336) ornalasqan.
– Elimizdegi kitaphanalardyń jıyntyq qory 110,3 mln basylymdy quraıdy, onyń ishinde 69,6 mln-y kitaptar. Eń iri kitap qory Almaty qalasynda shoǵyrlanǵan – 37,5 mln basylym. 2025 jyly kitaphanalarǵa kelýshiler sany 55,2 mln retke jetti. Bul kórsetkish boıynsha Almaty qalasy kósh bastap tur – 5,4 mln. Sondaı-aq Soltústik Qazaqstan oblysynda – 4,6 mln, Túrkistan oblysynda – 4,1 mln kelýshi tirkelgen, – delingen Ulttyq statıstıka bıýrosynyń dereginde.
Aıta keteıik, Qasym-Jomart Toqaev Qazaqstan halqyn Ulttyq kitap kúnimen quttyqtady.
