Eń iri krıptovalıýta bıtkoın 10%-dan asa qymbattady
LONDON. QazAqparat – Bıtkoın krıptovalıýtasynyń quny 9,8%-ǵa nemese 3 492,71 dollarǵa ósip, ótken jeksenbide 39 035,47 dollarǵa jetti, dep habarlaıdy QazAqparat Reuters agenttigine silteme jasap.
Eń iri elektrondy valıýta bıtkoın osy jyldyń 4 qańtarymen salystyrǵanda 40,7%-ǵa qymbattaǵan. Ol kezde bıtkoın quny 27 734 dollar bolǵan.
Ethereum – álemdegi ekinshi iri krıptovalıýta. Ol 7%-ǵa nemese 165,77 dollarǵa ósip, jeksenbi kúni 2 532,77 dollarǵa satylǵan.
«Tesla Inc» kompanııasynyń basshysy Ilon Mask jeksenbi kúni óziniń Twitter jelisindegi paraqshasynda jańartylatyn energııa kózderiniń úlesi bıtkoındy «óndirý» kezinde dástúrli jolmen óndirilgen energııa úlesinen asqan jaǵdaıda, bıtkoındy qoldanýdyń qaıta jandanatyny týraly habarlady.
Qazirgi kezde Tesla óz taýarlaryn satý kezinde bıtkoındy qabyldaýdy toqtatqan. Bul óz kezeginde Ilon Masktyń krıptovalıýta «óndiretin» kompıýterlerdiń kóp energııa jumsaıtyny týraly alańdaýshylyǵyn týdyrdy.
Avtory: Ádilet Seıilhanov
